Lufta që i ka shpallur qeveria kultivimit të hashashit, që është dhe një ndër akuzat kryesore të opozitës ndaj saj, ka bërë që policët të marrin malet në kërkim të plantacioneve. Dy efektivë të policisë së shtetit prej mbrëmjes së djeshme ishin bllokuar në pikën më të lartë të Kanioneve të Nivicës, në fshatin Progonat të njësisë Kurvelesh. Shefi i Rendit të Policisë së Tepelenës, Roland Zhapa, dhe oficeri Fejzo Meçi, kishin dalë për inspektim të zonës në kuadër të operacionit për parandalimin e mbjelljes së kanabisit, por ata janë bllokuar duke mos mundur të kthehen.
Në një zonë të rrezikshme ku nuk kishte as mundësi komunikimi me telefon ata kanë bërtitur deri sa fshatarët e zonës i kanë dëgjuar dhe kanë thirrur në ndihmë kolegët e tyre. Ata e kanë kaluar natën në mal pasi helikopteri e ka pasur të pamundur të ulet në zonë. Vetëm sot në mesditë janë shpëtuar dhe janë në gjendje të mirë.
Historia e treguar sipas policisë:
“Gjatë ditës së djeshme, Shefi i Rendit të Komisariatit të Policisë Tepelenë Komisar Roland Zhapa së bashku me SPZ-në e zonës Inspektor Fejzo Meçe, bazuar edhe mbi bazën e disa informacioneve të marra në rrugë operative së në pikën më të lartë të Kanioneve të Nivicës mund të ketë të kultivuara bimë narkotike, kanë ushtruar kontroll në territor. Për shkak të terrenit shumë të thepisur dhe shumë të vështirë, në pikën më të lartë të kanioneve eshte ngjitur Shefi i Rendit dhe SPZ i zonës. Ata kanë ushtruar kontroll ne kete territor por nuk kanë konstatuar bimë narkotike të kultivuara. Punonjesit e policise jane perpjekur të zbresin por kanë mbetur të bllokuar në krye të kanioneve. Për shkak të terrenit shumë të vështirë, nuk ishte e mundur t’ju vihej në ndihmë. Drejtori i Policisë së Shtetit ka urdhëruar alpinistët e repartit RENEA për të shkuar menjëherë në drejtim të tyre, pasi helikopteri e ka pasur të pamundur të ulej për të tërhequr dy efektivat e Policisë. Alpinistët e Reneas janë afruar në zonën ku kishin mbetur të bllokuar dy efektivët dje në mbremje, por për shkak të errësirës janë tërhequr pa mundur t’ju shkojnë në ndihmë.
Sot në drejtim të tyre ka qenë helikopteri i Emergjencave Civile, por për shkak të erës së fortë është ulur në fshatin Krahës të Tepelenës, në pritje të përmirësimit të kushteve të motit, pasi e kishte të pamundur kryerjen e operacionit të shpëtimit. Rreth orës 12.25 punonjësit e Policisë janë nxjerrë nga toka me ndihmën e punonjësve të policisë dhe të një bariu që e njihte mirë terrenin, pasi nga ajri helikopteri për shkak të erës së fortë nuk është futur dot” – informoi policia.
Policia thotë se të dy punonjësit janë mirë dhe po vijojnë lëvizjen të shoqëruar nga kolegët dhe një mjek i cili po kujdeset për gjendjen shëndetësore të tyre.
