Edhe pse Partia Demokratike e ka shndërruar në kauzë dekriminalizimin dhe e konsideron ligjin për të si një sukses të jashtëzakonshëm të saj, gjithnjë duke patur si shënjestër kundërshtaren e saj të përjetshme, PS-në, në fund, pas dorëzimit të deklarimeve, numri dy i saj, si Sekretar i Përgjithshëm, Arben Ristani, kryeson listën e politikanëve, posaçërisht deputetëve, përsa i përket procedimeve penale.
Ai është dënuar si gjykatës në vitin 1994 me 5 muaj burg dhe një vit me kusht për akuzën “Dhënie e vendimit të Padrejtë”. Por sipas sqarimeve që ka bërë, vepra penale për të cilën është akuzuar, në vitin 2008 është konsideruar si antikushtetues.
Por për ironi të fatit, pasi tij vjen Alban Zeneli, deputet i PD-së, i dënuar në vitin 1992, ai është dënuar me 6 muaj burg për akuzën “Shkelje e Rregullave të Qarkullimit Rrugor” ndërsa në vitin 1996 është dënuar me 30 mijë lekë gjobë për akuzën “kundërshtim i punonjësit të policisë dhe prishje të qetësisë publike”.
Më pas lista vijon me Mëhill Fufin, Edi Palokën, Fatmir Mediun, Përparim Spahiun, Armando Prengën, Parid Carën, Tom Doshin, Pjerin Ndreun, ku në renditjen e përgjithshme sa i përket parlamentit, PD-ja ja merr PS-së për numër më të madh personash më precedentë. Por ndërkohë, PS-ja ka dhe dy kryebashkiakë me njollë në biografi, Elvis Roshin e Kavajës dhe Artur Bushin e Krujës. Pra deri diku, janë aty-aty me rezultate të përgjithshme. /tesheshi.com/
