Demokracia po lëkundet në shumë vende dhe është e rëndësishme që ajo të ruhet, tha një nga të mbijetuarat e fundit të Holokaustit, Margot Friedländer, në prag të 80-vjetorit të çlirimit të Aushvicit.
Friedländer, e cila mbushi 103 vjeç, pranoi në një intervistë se “nuk kupton shumë nga politika”, por se “nuk është mirë që është kështu”.
Kur u pyet për ngritjen e partive të djathta në Evropë, ajo paralajmëroi: “Unë them gjithmonë, kështu filloi atëherë”.
“Kini kujdes, respektoni njerëzit, sepse kjo është gjëja më e rëndësishme”, shtoi ajo.
Sipas saj, hebrenjtë ishin pjesë e Gjermanisë po aq sa kushdo tjetër. Për shkak se ajo ishte nga një familje hebreje, nazistët e deportuan atë në kampin e përqendrimit Theresienstadt.
“Mesazhi im për të gjithë është: Jini njerëzorë. Pranoni të tjerët, pavarësisht se çfarë ngjyre e keni lëkurën apo çfarë feje jeni,” tha Friedlender. “Në fund, ne të gjithë vijmë në këtë botë në të njëjtën mënyrë.”
Ajo ka lindur në vitin 1921 në Berlin. Familja e saj u përpoq pa sukses të arratisej jashtë vendit në fillim të viteve 1940. Nëna dhe vëllai i saj u vranë në Aushvic.
Margot Friedländer arriti të qëndronte e fshehur për një kohë, por nazistët e gjetën atë në 1944 dhe e dërguan në Theresienstadt. Pas luftës ajo u shpërngul në SHBA me bashkëshortin e saj dhe u kthye në Gjermani në moshën gati 90-vjeçare.
Që atëherë, ai ka jetuar në Berlin dhe flet për përvojën e saj të Holokaustit në shkolla.
Kampi i vdekjes në Aushvic në Poloni u çlirua nga ushtarët sovjetikë më 27 janar 1945. Gjermania e ka shënuar përvjetorin si Ditë Kombëtare të Përkujtimit që nga viti 1996. /tesheshi.com/
