Serbia po përgatitet që doganierë të saj t’i vendosë në pikat kufitare në Kosovë që nga fillimi i muajt mars të këtij viti. Kjo, për shkak të kontrabandës së hatashme që bëhet në veri nga vetë serbët.
Një burim kofidencial serb, i tha “tesheshi.com” se qeveria e Serbisë ka marrë një vendim pasi është duke vuajtur shumë nga informaliteti dhe kontrabanda që janë duke bërë serbët e veriut, e që kjo po dëmton prodhuesit serbë të cilëve malli po u kthehet prapë në Serbi përmes rrugëve ilegale.
Burimi, një autoritet serb në dogana, sqaron se doganierët serbë që kanë punuar deri pas shpalljes së pavarësisë së Kosovës si doganierë të UNMIK-ut, në vitin 2008, me urdhër të qeverisë së Serbisë u tërhoqën nga pikat kufitare duke e kthyer uniformën doganore të UNMIK-ut dhe duke kaluar nën kompetencat e Ministrisë së Financave të Serbisë.
“Doganierët serbo-kosovarë të cilët në atë kohë kanë kaluar tek punëdhënësi i ri, Ministria e Financave të Serbisë, tash e 8 vite kanë marrë paga nga 150 euro, duke llogaritur këtu stazhin e punës si dhe sigurimet shëndetësore, por që kanë qëndruar në shtëpi. Dhe para tre muajve, me urdhër të qeverisë së Serbisë ata janë thirrur në punë praktike e cila pritet të përfundojë këto ditë me dhënien e një provimi për doganier në Beograd, për t’u punësuar më pas zyrtarisht në degën e doganës së Kralevës.”
Burimeve vijon të sqarojë se doganierët e rinj serbë, para se ta veshin uniformën duhet ta kryejnë edhe një trajnim që do të zgjas dy muaj dhe pas kësaj këta do të vendosen në pikat kufitare me Kosovës.
Sipas tij, ata do të vendosen në Merdare, Konçul -Dheu i Bardhë, Jarinje dhe Bërnjak.
“Doganierët që pritet të dalin në kufi me Kosovën, trajnimin janë duke kryer në qytetin e Kralevës, ndërsa pas dy muajve disa do të dërgohen urgjentisht në kufi e disa të tjerë do të qëndrojnë në trajnim shtesë ku do të pajisen edhe me armë”, shtoi më tej burimi, duke sqaruar se këta të fundit, pra doganierët e armatosur, do të punojnë në thyerjen e grupeve kriminale që janë duke kontrabandua mallra kryesisht me akcizë si dhe në patrullime doganore.
Me këtë veprim pra, Serbia është e interesuar që të zvogëlojë sa më shumë kontrabandën që po mbretëron në veri të Kosovës me Serbinë.
Sipas informacioneve, mallrat sidomos ato me akcizë që vijnë nga Serbia në Kosovë, rreth 70 për qind e tyre kthehet ilegalisht në Serbi, duke shkaktuar kështu dëme të mëdha financiare.
Siç saktëson burimi, malli hyn në Kosovë në rrugë zyrtare, ndërsa kthehet në Serbi përmes rrugëve alternative. Më pas në tregun serb ky mall shitet rreth 20 për qind më lirë, pasi i ikin TVSH-së. /tesheshi.com/
