Nga Blendi Gashi
Të premten e kaluar, Kuvendi i Kosovës zgjodhi gjyqtar të Gjykatës Kushtetuese, Radomir Labanin nga komuniteti serb me 71 vota dhe Bajram Latifin nga komunitetet jo shumicë me 58 vota me mandat 9-vjeçar, ndërsa dështoi të zgjedhë kandidatët shqiptarë që ishin në garë pasi asnjëri nuk mori votat e mjaftueshme.
Mirëpo zgjedhja e serbit Laban ka shkaktuar reagime të shumta, jo pse ijen nga ky komunitet, por për shkak të kaluarës së tij të dyshimtë në Serbi. Ai raportohet së është dënuar qysh në vitin 2012 nga Gjykata Themelore në Beograd si pjesë e një grupi kriminal i cili kishte kontrabanduar tekstil, teknikë të bardhë, cigare, alkool etj.
Grupi i quajtur “Carinska Mafija”, i përbërë nga 17 persona, mes tyre edhe Laban sipas medieve serbe, ishte arrestuar në vitin 2006.
“Të anulohet votimi i Kuvendit”
Ndaj emërimit të Labanit si gardian i Kushtetueses kosovare e para ka reaguar Albulena Haxhiu deputete e Vetëvendosjes e cila përmes një postimi në Facebook, ka kërkuar të anulohet votimi i Kuvendit.
“Neni 114 paragrafi 1 i Kushtetutës thotë: ‘Gjykata Kushtetuese përbëhet nga nëntë (9) gjyqtarë, të cilët do të jenë juristë të shquar dhe personalitete me moralin më të lartë….’
Ndërsa sipas Ligjit për Gjykatën Kushtetuese Neni 4 paragrafi 1.3. “Gjyqtarët e Gjykatës Kushtetuese duhet të jenë individ me reputacion të shkëlqyeshëm moral, të cilët kanë aftësi të plotë veprimi dhe të cilët nuk janë dënuar për vepër penale’
Radomir Laban i dënuar si anëtar i një grupi kriminal sipas kësaj dispozite kushtetuese dhe sipas Ligjit për Gjykatën Kushtetuese NUK mund të jetë anëtar i Gjykatës Kushtetuese andaj ai votim i turpshëm i Kuvendit duhet të anulohet!”, shkruan Haxhiu.
Ndaj emërimit të Labanit ka reaguar edhe Këshilli për Mbrojtjen e të Drejtave dhe Lirive të Njeriut, ku me anë të një letre i kërkon presidentit Hashim Thaçi që mos ta dekretojë si gjyqtar të Gjykatës Kushtetuese pa u verifikuar e kaluara e tij.
Për rastin në fjalë, KMDLNJ mendon se është lëshim i atyre që është dashur ta bëjnë verifikimin e së kaluarës të çdo kandidati që ka konkurruar për pozitën e gjykatësit të Gjykatës Kushtetuese aq më parë që nuk mund t’iu besohet kandidatëve për të kaluarën e tyre.
“Nuk ka dyshim se deputetët e komunitetit serb e kanë ditur për të kaluarën e dyshuar kriminale të z.Laban mirëpo shtrohet pyetja nëse këtë e kanë ditur edhe shqiptarët dhe përsëri e kanë votuar ?! Rasti Laban, nëse del të jetë i vërtetë tregon qartazi për mungesën e koordinimit midis segmenteve të caktuara të sistemit të sigurisë e që janë përgjegjëse për verifikimin e së kaluarës për pozita ku kërkohet sqarimi për të kaluarën. Nëse rasti Laban është përtej dyshimeve të shprehura në media dhe dëshmohet e kaluara e tij e cila është në shpërputhje me postin e synuar dhe për fat të keq të votuar nga deputet të papërgjegjshëm , z.Laban jo që nuk duhet të dekretohet si gjykatës i Gjykatës Kushtetuese të Kosovës por ndaj tij duhet të fillojnë hetimet për paraqitje të pavërtetë të fakteve , fshehje të së vërtetës dhe falsifikim të dokumenteve”, thotë KMDLNJ.
Kujtojmë se në janar të vitit 2011, Laban nisi punën në Gjykatën Kushtetuese si këshilltar juridik senior.
Mbetet të shihet pas reagimeve të ngritura së fundmi nëse Laban do të ftohet nga presindeti Thaçi për t’u dekretuar si guardian i kushtetutës apo jo. /tesheshi.com/
