Një sulm të rëndë në zemër, jo nga shkaqe natyrale, thuhet se ka pësuar nga ministri rus i Mbrojtjes Sergei Shoigu, sipas Daily Mail, që citon një dëshmi të një biznesmeni ruso-izraelit. Shoigu, krahu i djathtë i Putinit dhe kreu i ushtrisë ruse për një dekadë, ishte një nga figurat kryesore në javët e para të luftës në Ukrainë. Megjithatë, kohët e fundit ai u zhduk nga përditësimet e rregullta të Kremlinit.
Në fund të marsit, pati dyshime për tensione në marrëdhëniet mes tij dhe Putinit, për shkak të ecurisë zhgënjyese të luftës. Sipas inteligjencës amerikane, marrëdhënia e tyre u prish kur Vladimir Putin u informua për shkallën e humbjeve ruse në Ukrainë.
Shoigu, tani 66 vjeç, mendohet të jetë në kujdes intensiv. Sipas biznesmenit Leonid Nevzlyn, ai pësoi një atak në zemër që “nuk mund të ndodhte për arsye natyrore”, duke sugjeruar se ish-aleati i ngushtë i Putinit mund të ketë qenë viktimë e një atentati të urdhëruar nga shefi i tij.
Nga një aleat i Putinit, kritiku i tij kryesor
Shoigu u pa për herë të fundit dje në një telekonferencë me Putinin dhe ministra të tjerë mbi zhvillimin e Arktikut. Megjithatë, ai në asnjë moment nuk foli. Ka spekulime se Kremlini po përdor planet e tij të regjistruara më parë.
Nevzlyn, një ish-manjat i medias dhe ekzekutiv i naftës, është një nga biznesmenët rusë të detyruar të largohen nga vendi në vitin 2003, kur ai u vu në shënjestër nga Kremlini sepse Putin vendosi të merrte në dorë kompaninë e naftës Yukos. Ai u dënua në mungesë me burgim të përjetshëm në vitin 2008 dhe njoftoi muajin e kaluar se i ishte hequr pasaporta ruse, duke thënë se “çdo gjë që prek Putin vdes”.
Duke cituar burime në Moskë, Nevzlyn tha së fundi: “Shoigu është jashtë loje dhe mund të jetë me aftësi të kufizuara nëse mbijeton. Thashethemet thonë se ai ka pësuar një atak në zemër, i cili nuk mund të jetë për shkaqe natyrale”.
Arrestimi i 20 gjeneralëve rusë
Biznesmeni pretendoi se 20 gjeneralë rusë janë arrestuar, pasi janë akuzuar për përvetësim deri në 10 miliardë dollarë, që do të jepeshin për luftën në Ukrainë.
Sipas Nevzlyn, të gjithë drejtuesit që kishin fonde për të mbështetur “çlirimtarët rusë” të Ukrainës që nga viti 2014, pas aneksimit të Krimesë dhe fillimit të konfliktit në Donbas, ishin arrestuar.
Thashethemet për një përçarje mes Putinit dhe ushtrisë
Nëse pretendimet e biznesmenit rezultojnë të vërteta, atëherë do të vërtetoheshin dyshimet se ka një përçarje të madhe mes Putinit dhe zyrtarëve të lartë të ushtrisë dhe shërbimeve ruse të sigurisë.
Në fund të marsit, inteligjenca amerikane pretendoi se Putini, i cili ishte izoluar muajt e fundit, ishte lënë në errësirë për pushtimin rus nga këshilltarët e tij, shërbimi sekret rus dhe gjeneralët e lartë ushtarakë.
“Ne do të pajtohemi me përfundimin se Putini nuk është informuar plotësisht nga Departamenti i tij i Mbrojtjes për çdo hap në muajin e fundit”, tha zëdhënësi i Pentagonit, John Kirby.
Prishja e Putinit me Shoigun
Shoigu u emërua ministër i Mbrojtjes i Rusisë në vitin 2012 dhe ka qenë një nga aleatët më të ngushtë të Putinit gjatë dekadës së fundit. Madje ata të dy kanë bërë edhe pushime të rregullta bashkë dhe konsiderohet se kanë pasur një miqësi të ngushtë personale, jashtë posteve që mbanin.
Megjithatë, si kreu i ushtrisë ruse, Shoigu konsiderohet ndoshta personi i parë që ndjeu zemërimin e presidentit rus kur u informua për zhvillimet në frontin ukrainas.
Sipas forcave të armatosura të Ukrainës, rreth 20 mijë ushtarë rusë janë vrarë që nga 24 shkurti, kur filloi lufta, ndërsa sipas vlerësimeve të përmbajtura të Perëndimit, numri i viktimave i kalon 10 mijë.
Nevzlin tha gjithashtu se Kremlini kishte nisur tashmë një procedim penal kundër ish-zëvendëskryeministrit Arkady Dvorkovich, një nga zyrtarët më të lartë që kritikoi luftën në Ukrainë. Pak ditë pas deklaratës së tij, ai dha dorëheqjen si drejtues i Institutit të Shkencës dhe Teknologjisë Skolkovo, pasi akuzohej si tradhtar. Sipas biznesmenit ruso-izraelit, ai pritet të dëshmojë kundër kolegëve dhe miqve të tij, ndërsa sipas burimeve nga shërbimi inteligjent rus, nëse nuk arrin marrëveshje me autoritetet hetuese, do të transferohet në një qendër paraburgimi. /tesheshi.com/
