Lojtarët e futbollit tani do të mund t’i raportojnë gjyqtarit një gjest ose fjalë raciste duke bërë një shenjë X me duar, njoftoi FIFA të premten si pjesë e luftës kundër diskriminimit, me presidentin Gianni Infantino që gjithashtu tregoi këtë simbol.
Organi drejtues i futbollit botëror tha se racizmi do të ishte një shkelje më vete në kodin disiplinor të sportit, me sanksione më të ashpra, duke përfshirë konfiskimin e ndeshjeve.
Qëndrimi global kundër racizmit u mbajt gjatë kongresit vjetor të 211 anëtarëve të FIFA-s në Bangkok, pas muajsh konsultimesh me lojtarët që kanë pësuar abuzime nga kundërshtarët apo tifozët.
Ylli i Real Madridit, Vinicius Jr. është një nga lojtarët më të zëshëm që flet kundër racizmit në futboll. Shpesh herë në shënjestër të ofendimeve të këtij lloji në stadiumet spanjolle, sulmuesi brazilian 23-vjeçar ka shpërthyer së fundmi në lot teksa ka folur në një konferencë për shtyp për luftën kundër diskriminimit.
Disa ndeshje futbolli, veçanërisht në Evropë, janë ndërprerë më tej javët e fundit për shkak të incidenteve raciste në tribuna.
“Ka probleme në futboll,” pranoi presidenti i FIFA-s, Gianni Infantino në prill, duke bërë thirrje për unitet në luftën kundër racizmit dhe dhunës në stadiume. /tesheshi.com/
