Kina ka ndërtuar gati 400 kampe paraburgimi në rajonin Xinjiang dhe ndërtimi i dhjetëra të tjerave do të zgjasë të paktën edhe dy vjet, megjithëse autoritetet kineze thonë se sistemi i tyre i “riedukimit” po tkurret, ka gjetur një organizatë australiane, cituar nga The Guardian.
Rrjeti i kampeve në perëndimin e largët të Kinës, ku po mbahen ujgurët dhe anëtarët e pakicave të tjera muslimane, përfshin 14 që janë ende duke u ndërtuar, sipas imazheve satelitore të marra nga Instituti Australian për Politikë Strategjike (ASPI).
Në total, ASPI ka identifikuar 380 qendra paraburgimi të krijuara në këtë rajon që nga viti 2017 dhe midis tyre forma të ndryshme, nga kampe riedukimi me sigurinë më të dobët, te burgjet e fortifikuara.
Guardian thotë se kjo është 100 më shumë se hetimet e mëparshme dhe analistët besojnë se ata tani kanë konfirmuar ekzistencën e shumicës së qendrave të paraburgimit në rajon.
“Dëshmitë nga kjo bazë e të dhënave tregojnë se, përkundër pretendimeve nga autoritetet kineze se numri i njerëzve në kampe është në rënie, investimet e vazhdueshme në ndërtimin e njësive të reja të paraburgimit vazhduan në 2019 dhe 2020”, tha studiuesi i ASPI, Nathan Russer.
Ky informacion, së bashku me koordinatat e kampeve individuale, publikohen për publikun në një bazë të dhënash që mund të arrihet përmes internetit – Projekti i të Dhënave Xinjiang.
Punë e detyruar
Kampet u identifikuan në përputhje me deklaratat e atyre që i mbijetuan qëndrimin aty, pastaj përmes projekteve të tjera të monitorimit të paraburgimit, dhe me ndihmën e imazheve satelitore.
ASPI deklaron se shkrepjet e natës ishin veçanërisht të dobishme sepse po kërkonin hapësira që janë ndriçuar kohët e fundit jashtë qyteteve; shpesh këto vendndodhje ishin vendet e qendrave të reja dhe të dhënat ditore më pas jepnin një pamje të qartë të ndërtimit.
Shumë nga qendrat janë afër zonave industriale dhe ka shumë histori dhe thashetheme që disa të burgosur po përdoren në punë të detyruar, sipas Guardian.
Pekini zyrtar pretendon se të drejtat e njeriut nuk shkelen në Xinjiang. Autoritetet kineze fillimisht mohuan ekzistencën e kampeve të paraburgimit, për t’i përshkruar më vonë ato si vende për trajnimin e biznesit dhe programet e riedukimit, me qëllimin për të zvogëluar varfërinë dhe kërcënimin e terrorizmit.
Vitin e kaluar, një zyrtar i lartë pretendoi se shumica e njerëzve nga kampi “u kthyen në shoqëri”. Sidoqoftë, Kina nuk i lejon gazetarët, aktivistët e të drejtave të njeriut ose diplomatët e pavarur të kenë qasje në kampe dhe vizitorët në rajon përballen me një mbikëqyrje të fortë.
Njëqind ndërtesa në një kamp
Shumica e informacionit rreth kampeve dhe fushatës më të gjerë shtetërore kundër pakicave muslimane në rajon vjen nga ata që mbijetuan në kampe dhe ikën jashtë Kinës, e më pas nga dokumente të autoriteteve kineze që “rrodhën”, dhe imazhe satelitore që konfirmuan vendndodhjen dhe ekzistencën e kampeve.
Njerëzit kanë qenë në shënjestër për vepra “të parëndësishme” të tilla si posedimi i Kur’anit ose refuzimi i mishit të derrit. Abuzimet e raportuara përfshijnë ndalimin arbitrar, torturat dhe mosdhënien e ndihmës mjekësore në kampe, si dhe kontrollin e detyruar të shtatzënisë.
The Guardian vazhdon duke thënë se familjet ujgure janë detyruar të marrin zyrtarë kinezë në shtëpitë e tyre për të jetuar me ta si “të afërm”, si pjesë e një sistemi kompleks të mbikëqyrjes që gjithashtu monitoron njerëzit në internet, si dhe me një rrjet të madh të kamerave në vende publike.
Kampi më i madh i dokumentuar quhet Dabancheng dhe ndodhet afër kryeqytetit rajonal Urumqi. Gjatë punimeve të fundit të ndërtimit, ai mbuloi më shumë hapësirë dhe tani ka pothuajse 100 ndërtesa në të. /tesheshi.com/
