Një konflikt mes vetë artistësh është konsumuar së fundit në hapësirën para Teatrit Kombëtar. Laert Vasili, aktor i teatrit, një ndër përkrahësit e projektit të Teatrit të Ri, është konfliktuuar me kolegë që mbrojnë godinën ekzistuese, ithtarë të së vjetrës.
Incidentin e bëri të ditur vetë Vasili, ku, duke shfaqur një video, shkroi:
“‘Aleanca e Rehatit’, këta uzurpatorë të pronës publike, në këto çaste pasi më dhunuan fizikisht me në krye z.Robert Budina i cili më futi thonjtë në grykë dhe duke më sharë me libër shtëpie u përpoqën të bëjnë lajm për të dalë nga anonimati i jashtëligjshmërisë! Një turp e faqe e zezë që ndodh në mes të kryeqytetit nga njerëz të dhunshëm që duan të kthejnë ‘97 në Art! Dhuna dhe çdo formë tjetër e jasthëligjshme do të përballet me drejtësinē. Haram ato 10 milionë që njerëzit e mi ju kanë sponsorizuar për filmat tuaj z. Budina! Bukëshkalë!”.
Nga ana tjetër Aleanca nën akuzë është mbrojtyur me versionin e saj rreth incidentit, po ajo çfarë bie në sy, është fakti se quhet “i ashtuquajtur aktor”.
“Pikërisht kur aktivistët e Aleancës po përcillnin trupën teatrore austriake pas përfundimit të shfaqjes ‘Acar’ që ata dhanë në kuadër të Festivalit për Mbrojtjen e Teatrit, një i ashtuquajtur aktor, për të cilin na ishte sinjalizuar se në orët e para të datës 20 Dhjetor, kishte grisur posterat e ekspozitës së Avni Delvinës të ngjitur në hyrjen e teatrit, vjen për herë të dytë më 22 dhjetor rreth orës 2.00 të natës për të shklyer me duar banderolën e Aleancës, kumtin tonë të protestës ‘Monument Kulture, Mbrohet nga Populli’.
Aktori për identitetin e të cilit nuk ka më asnjë dyshim, pasi dje e zumë gafil dhe me kameran ndezur, quhet Laert Vasili. Ai filloi të provokojë duke thirrur me emër kolegë, aktorë, duke u improvizuar me lojë të shëmtuar aktoriale si viktimë dhe i dhunuar. Autorësinë e tij tani e kemi të konfirmuar për të dyja rastet: në datë 20 ai është parë nga roja e godinës dhe një nga aktivistët, dhe mbrëmë është zënë gafil.
Theksojmë se autori në fjalë i kapur gafil në akt vandalizmi, nuk është dhunuar, por është tentuar të mbahet aty, për t’ia dorëzuar forcave të policë.
E gjitha kjo është e dokumentuar me video, ndërkohë që videoja e autorit të vandalizmit është e prerë, sepse mesa duket i ka dalë jashtë skenarit”, thuhet ndër të tjera në reagimin e Aleancës për Teatrin.
Kujtojmë se në një ndër filmat e fundit të vëllezërve Budina, Edmond dhe Robert, të cilët në krye të mbrojtjes së teatrit të vjetër, pikërisht te “Ballkan Pazar”, Laert Vasili luan rolin e Ilias.
E tani, për shkak të mosdakortësie për të ardhmen e godinës së teatrit, Vasilit i vihet në dyshim të qënit aktor. /tesheshi.com/
