E bija e të “fortit” të Dibrës vë në sprovë Ramën: lë PDIU-në dhe kalon në PS

Pothuasje është shkërrmoqur ngrehina PDIU që Shpëtim Idrizi ngriti në Dibër, atje ku ka vetëm një çam. Deputetja e kësaj zone nën siglën e PDIU-së, Reme Lala ka deklaruar kalimin në PS, mu në ditën që Rama promovoi nisjen e punimeve të Rrugës së Arbrit.

“Në këtë vit të parë për mua si deputete kam mundur të kuptoj se nuk janë të gjithë njësoj siç duken nga televizori. Sot, në sy të dibranëve dhe tuajin po ju them se dua të bashkohem me më të mirat dhe më të mirën, Partinë Socialiste që nuk është më e mira por më të mirë vërtetë nuk kemi parë”, tha Lala, e cila në fakt nuk kishte asnjë lidhje me Çamërinë dhe çamët, por ishte produkt i modelit LSI që Shpëtim Idrizi kërkoi të aplikonte me partinë e tij.

Reme Lala, një figurë krejt e panjohur për Dibrën, pa ndonjë kontribut apo prestigj publik, arriti ta sigurojë mandatin e deputetes duke qenë e bija e atij që njihet si “i forti” i Dibrës, Imer Lala, emrin e të cilit e ka përmendur disa herë në parlament edhe ish-kreu demokrat Berisha.

Dhe ky kalim i së bijës në PS vjen në kohën kur PDIU nis të humbasë terren pas zgjedhjeve të qershorit, pasi siç LSI, mbeti dhe ajo jashtë tepsisë së pushtetit. Por e kishte një thelë pikërisht në Dibër, e kjo ishte Bashkia. Por dhe atë nisi ta humbte dalëngadalë shoqëruar dhe me incidente, siç qe ai i muajve më parë, kur të punësuar të PDIU-së në pushtetin lokal u përfshinë në një sherr fizik me një të dërguar nga Tirana si shef personeli, i cili kishte si mision pikërisht pastrimin e Bashkisë së Dibrës nga ushtria e të punësuarve nga dega çame, që në fakt ishte vetëm një njeri: Imer Lala.

Kjo është shfaqur dhe në replikat në distancë mes kreut socialist të Bashkisë, Muharrem Rama dhe Reme Lalës si deputete. Por tashmë, kjo e fundit ka bërë kapërcimin politik, dukshëm duke nuhatur daljen e PDIU-së jashtë loje dhe humbjen dalëngadalë të influencave në terren.

Kjo përbën dhe një sprovë për kryeministrin Rama, pasi i duhet të marrë në parti të bijën e një “të forti”, nga i cili mund të ketë kosto politike. PD i rri gati çdo rasti të tillë. /tesheshi.com/