E njohur si një kundërshtare e flaktë e Isa Mustafës, Donika Gërvalla, e bija e aktivistit të njohur kosovar të viteve `80 ekzekutuar në Gjermani, Jusuf Gërvalla, e ka braktisur përfundimisht LDK-në ku aderonte, si kryetare e degës për Gjermaninë, duke e quajtur atë si një parti të degjeneruar.
“Pas vdekjes së Presidentit Rugova, LDK-ja ka degjeneruar hap pas hapi dhe në ndërkohë na mbetet të konstatojmë vetëm vdekjen e saj”, thotë Gërvalla në përligjie të aktit të dorëheqjes.
“Ky proces i degjenerimit të LDK-së u fillua nga kryetari i atëhershëm Sejdiu dhe u vulos nga pasardhësi i tij Isa Mustafa. Në vend të mbrojtjes së interesave të qytetarëve dhe parimeve të LDK-së, këta dy kryetarë të LDK-së filluan të bënin garë se kush më shumë dhe kush më shpejt bie i nënshtrohet strukturave kriminale, të cilave ia dorëzuan fatin e vendit dhe të qytetarëve të Kosovës”, shton ajo.
Pasi i bën një rezyme të gjatë angazhimit të saj në LDK, por dhe zhvillimeve në këtë parti ndër vite, ajo e pohon me pezm se ndihet e pafuqishme për të vazhduar më tej.
“Kush konstaton që një organizatë apo parti është duke u zhvilluar keq, duhet të bëjë çmos për ta ndalur këtë zhvillim. Mirëpo kush e sheh që me gjithë përpjekjet e shumta nuk ndalet ky zhvillim, atëherë duhet të marrë vendimet e nevojshme.
Në LDK tashmë është e pamundur të punosh me nder dhe dinjitet për përparimin e Kosovës. Shpresa e fundit ka vdekur. Kush beson në ndryshime në këtë LDK rrezikon të mashtrojë vetveten”, shprehet znj. Gërvalla. /tesheshi.com/
