Policia e Kosovës ka arrestuar pesë qytetarë të komuniteti serb në komunën e Gjilanit, nën dyshimin e bazuar se ata janë përfshirë në veprimtari kundër rendit kushtetues dhe sigurisë së Kosovës.
Përmes një njoftimi për media, policia ka bërë të ditur se operacioni nuk është zhvilluar kundër ish-pjesëtarëve serbë të Forcave të Sigurisë së Kosovës, siç kanë raportuar sot mediet.
“Gjatë këtij operacioni deri më tani në cilësinë e të dyshuarve janë arrestuar pesë persona (m/s/k), nën dyshimin e bazuar se të njëjtit janë përfshirë në veprimtari kundër rendit kushtetues dhe sigurisë së Republikës së Kosovës. Demantojmë disa mediume/portale serbe, të cilat deklarojnë se po realizohet një operacion policor ndaj disa ish-pjesëtarëve të FSK-së, dhe sqarojmë se këto janë vetëm disa supozime apo spekulime të mediave në fjalë”, thuhet në njoftim.
Policia më tej garanton të gjithë qytetarët pa dallim se veprimet e saj i bazon në Kushtetutën e vendit dhe legjislacionit në fuqi, ndërsa thotë se operacioni policor është duke vazhduar në bashkëpunim dhe koordinim me autoritetet e drejtësisë. /tesheshi.com/
