Nga Blendi Gashi
Vetëvendosje, si asnjëherë më parë sot ka pritur “mysfairë” brenda sallës së seancave plenare. Dhe kjo për dy vota të bekuara prej saj, që Demarkacioni të kalojë. Qysh në fillim të seancës, tek deputetë të caktuar të kësaj partie shkuan pothuajse i tërë kabineti qeveritar si dhe zyrtarë të partisë opozitare, LDK-së, për t’i bindur që të japin votën pro Demarkacionit me Malin e Zi.
Dhe sigurisht targeti nuk ishte Albin Kurti dhe deputetët që e përkrahin atë, pasi dihet qëndrimi i palëkundur kundër, por krahu i të dorëhequrve në krye me Dardan Molliqajn e Visar Ymerin.
Pikërisht tek këta dy të fundit shkuan për vizitë mysafirë që kurrë më parë nuk ju trokitën në derë, por e bën sot për t’ua marrë votat dhe duke ditur “armiqësinë” që kanë krijuar me Kurtin.
Duke filluar nga kryeministri Ramush Haradinaj; pastaj zv.kryeministri nga radhët e PDK-së, Enver Hoxhaj; zv.kryeministri tjetër, Behgjet Pacolli; shefi i grupit të deputetëve të LDK-së, Avdullah Hoti; si dhe dy kolegët e tij të partisë, Kujtim Shala e Lumir Abdixhiku, të cilët për disa minuta qëndruan me Molliqajn e Ymerin që t’i bindin për ta dhënë votën për Demarkacionin.
Por të gjithë këta nuk kanë sjellë rezultat. Molliaj e Ymeri nuk e kanë tradhëtuar idealin vetëvendosës, më saktë Kurtin.
Ndërkohë, krahu Kurti ka sjellë me vete peticionin kundër Demarkacionit të cilin më 2016 e nënshkruan partitë opozitare në shenjë kundërshtimi nga kalimit tutje të kësaj marrëveshjeje.
Kujtojmë se Kuvendi është në pauzë dhe kryeministri Ramush Haradinaj ka deklaruar në një paraqitje për media se “nuk e di nëse duhen dy apo më shumë vota për kalimin e marrëveshjes së Demarkacionit”.
Demarkacioni duhet të kalojë në Kuvend me dy të tretat e votave të deputetëve, ose 80 vota, por dje u tha se janë konfirmuar 78 nga to. /tesheshi.com/
