Nga Blendi Gashi
Dy vjet më parë, Isa Mustafa mori dritën jeshile nga Kuvendi i Kosovës për mandatin 4-vjeçar si kryeministër i vendit, pasi 73 ligjvënës votuan “pro” zgjdhjes së tij, 38 ishin kundër dhe 2 të tjerë abstenuan.
Por mes atyre që nuk ia dhanë votën, ishin dhe disa deputetë të LDK-së, pra vartës të tij edhe në parti, çka e detyroi që të shfaqet arrogant. Pasi bëri betimin, Mustafa falënderoi të gjithë, por jo “të tijtë” që nuk ja dhanë votën, për arsye të mosdakortësisë për koalicion me PDK-në e Hashim Thaçit.
“Falënderoj për këtë besim për të gjithë ju që më votuat, ata që votuan kundër dhe abstenuan sepse është e drejtë e secilit që të votojnë. Natyrisht se kjo vlen për të gjithë ju, por jo edhe për deputetët e LDK-së”, tha Mustafa në fjalimin e tij të parë të mbajtur si kryeministër në Kuvend.
Kjo frazë u kritikua jo vetëm nga zërat e partisë së tij por edhe analistë politikë. Kjo sjellje bëri që më pas, brenda parti së drejtuar prej tij të shfaqen pakënaqësitë. Mustafa, “të padëgjuarit” e tij i ndëshkoi duke mos iu dhënë poste apo më vonë duke i larguar edhe nga Këshilli i Përgjithshëm i LDK-së në zgjedhjet e reja të kësaj partie ku ai mori edhe një mandat tjetër si kryetar. “Viktimë” e tij ra më së shumti Vjosa Osmani, që dikur e pati ndër më të afërtat, së cilën jo vetëm nuk e emëroi gjëkundi me ndonjë post, por ia mohoi dhe kandidimin për kryetare të LDK-së, deri në moszgjedhjen as si anëtare e strukturave të partisë. Osmani mbeti vetëm një deputete e LDK-së, e njëherit zë i fuqishëm kundër Mustafës.
“Vota s’ishte kundër Mustafës, por ndaj koalicionit PDK-LDK”
Deputeti i LDK-së, Adem Salihaj, një prej atyre që votoi kundër, thotë se nuk e kishin inatin me Isa Mustafës, porse ishte një votë parimore kundër një koalicioni me PDK-në.
“Deputetët që votuan kundër ishin plotësisht në harmoni me qëndrimet e të gjitha organeve të LDK-së,të cilat në vazhdimësi kishin marrë vendime që LDK asnjëherë të mos bënte koalicion me PDK-në. LDK asnjëherë nuk ka marrë vendim që të nënshkruajë marrëveshje koalicioni me PDK-në, ky koalicion u bë pa vendimin e organeve të partisë dhe në kundërshtim të plotë me vullnetin e elektoratit të saj. Si rrjedhim,askush nuk ka të drejtë ti akuzojë deputetët e LDK-së që votuan kundër koalicionit për qëndrimin e tyre. Qëndrimi im dhe i disa deputetëve të tjerë nuk lidhet me inate e as pakënaqësi,ka të bëjë vetëm me parime”, thotë Salihaj për tesheshi.com.
Në videon më poshtë mund të shikoni videon e plotë të fjalimit të Isa Mustafës me rastin e zgjedhjes kryeministër i vendit:
