Edona Bilali, ministrja e Sipërmarrjes, ka guxuar t’i kundërvihet raportit të radhës së DASH mbi klimën e biznesit në Shqipëri, plot kritika, duke iu drejtuar një emri: Enio Jaço, drejtuesi i Dhomës Amerikane të Tregtisë,
“Drejtuesi i AmCham para katër ditësh (vetëm pasi u publikuan statistika me shifra) pohon dhe shprehet i kënaqur që janë trefishuar investimet amerikane ne vend.
Tre ditë më vonë, pas publikimit raportit të Departamentit të Tregtisë (i parifreskuar prej 2 vjetësh), rimarrë nga DASH me disa ndryshime, shprehet që problem është klima jo miqësore e biznesit. Pyetja që të vjen menjëherë në mendje është, si e shpjegon drejtuesi shqiptar i AmCham (normalisht ai duhet të kontribuoje në leximin objektiv të aktualitetit në terren) faktin se amerikanet investuan 3 herë më shumë në Shqipëri për katër vitet e fundit, ndërkohë që një seri investimesh të tjera të mëdha amerikane janë ne proces përgatitjeje?!
Askush nuk i mohon këto probleme, po qyshse jam në këtë detyrë as e kam hasur dhe as kam dëgjuar për ndonjë kompani amerikane apo europiane, që e ka penguar klima e biznesit në Shqipëri të investojë! Madje përkundrazi, kam pasur vetëm reagime shume pozitive prej tyre për mikpritjen dhe trajtimin në Shqipëri. Njëjtë kam dëgjuar edhe nga koleget e mi!
Sa gjynah kur bashkëqytetarë tanët, aq me tepër në funksione të tilla ndikojnë për keq, pa asnjë fakt apo shifër, në ushqimin e perceptimeve të deformuara prej vitesh qoftë tek opinioni publik, qoftë tek miqtë dhe partnerët e huaj!”, shkruan Bilali, duke lënë për në fund një sukses të pretenduar qeverisës:
“Por shyqyr në fund mbetet si gjithnjë puna me faktet e punës, për të cilat flet sot edhe Shqipëria turistike, me të dhënat e saj mbresëlënëse!”, shkruan ajo.
Por i duhet thënë se Shqipëria turistike është me tepër trend sesa ndonjë arritje klasike qeveritare. Është trend global, siç janë trend global lëvizjet e forta demografike me të cilat qeveria përligj ikjet frenetike të shqiptarëve. Se mos qe trend tejshqiptar “ikja”, e cila pra ka kapluar shumë vende në rajon e me gjerë, do mjaftonte pikërisht ajo për ta vulosur këtë qeverisje si të dështuar kryekreje. Kështu dhe për turizmin: është thjesht trend, që do thotë se do kishte këtë prurje dhe me tjetër qeverisje, siç do ishin të njëjtat ikje shqiptarësh dhe po të mos ishte Rama në pushtet. /tesheshi.com/
