Dy mandate po provokojnë një tjetër krizë në Maqedoni. Ato janë njëherësh dhe shprehje e faktit se zgjedhjet në këtë vend nuk e kanë zgjidhur krizë dhe se me gjasë ajo do të thellohet akoma dhe më tej. Shkak janë dy mandate të pretenduara, një nga LSDM dhe tjetra nga BESA, të cilave duhet t’i hiqen VMRO-së.
Dy partitë në opozitë kanë çuar pranë Komisionit Shtetëror Zgjedhor në Shkup dokumentacionin e tyre ankimues, por ky institucion, si pasojë e presionit, edhe fizik, ende nuk ka dhënë vendim përfundimtar, gjë që sipas ligjit duhet ta japë këtë të enjte.
Por përkrahes të partisë së Gruevksit janë mbledhur para KSHZ-së në mbrojtje të dy mandateve, të cilat nëse i hiqen VMRO-së, bëhet akoma dhe më pamundur formimi i qeverisë së re. Sepse nëse ndodh kjo, opozita barazohet në mandate me mazhorancën; që do të thotë se nuk ka asnjë fitues.
Edhe pse një mandat i përket BESËS, kjo e fundit po luan rolin e spektatores pasi LSDM-ja e Zaevit po e bën betejën për të dyja, pasi në këtë moment për të nuk ka rëndësi nëse njëri shkon për BESËN. Ndaj dhe kjo e enjte është delikate për zhvillimet në politikën maqedonase. /tesheshi.com/
