Nga Bashkim Kastrati
Tashmë kur kanë mbetur edhe pak ditë nga fillimi i fushatës elektorale për zgjedhje t e parakohshme në Kosovës, partitë politike do të duhej që të publikonin emrat e të gjithë kandidatëve për deputet. Çuditërisht, dy koalicionet më të mëdha PDK-AAK-NISMA dhe LDK-AKR-Alternativa nuk i kanë publikuar ende listat e kandidatëve për deputetë që i kanë dërguar në Komisionin Qendror të Zgjedhjeve për certifikim.
Lidhja e koalicioneve të lartcekura ka shkaktuar tkurrje të listave të kandidatëve nga këto parti dhe rrjedhimisht një pjesë kanë mbetur të pakënaqur. Mospublikimi i listave të kandidatëve për deputet po kritikohet nga shoqëria civile. Ata e konsiderojnë si të paarsyeshme vonimin e publikimit të listave, kur ato lista janë miratuar nga organet drejtuese të partive përkatëse.
Fshehja e listave të kandidatëve nga koalicionet më të mëdha, ka nxitur reagime dhe dyshime të ndryshme se kush mund të jetë e kush jo në ato lista dhe se mund të ketë ndonjë kandidat që nuk do të pranohet nga KQZ-ja dhe ai të zëvendësohet në heshtje.
Lëvizja Vetëvendosje është i vetmi subjekt politik që e ka publikuar listën e 110 kandidatëve për deputet sapo e ka dërguar listën në KQZ. Ky subjekt politik e ka publikuar këtë listë në web-sajtin e saj dhe në profilin e zyrtar të faqes në Facebook. Gjithashtu ka mbajtur një tubim ku ka prezantuar veç e veç të gjithë kandidatët për deputetë.
Mospublikimi i këtyre listave ka vënë mjegull më shumë edhe tek disa ish-deputet të LDK-së që e kanë kundërshtuar demarkacionin me Malin e Zi dhe koalicionin e LDK-së me PDK-në. Shembull disa herë është raportuar se Vjosa Osmani nuk është futur në listë, por pati raportime se ajo është futur megjithatë me një renditje jo aq të mirë (83) edhe pse ka qenë femra më e votuar në Kosovës me rreth 40 mijë vota. Ndërkaq në një listë e publikuar sot në media nuk figuron emri i ish-deputetit Osmani.
Mospublikimi i listave ka bërë që as Adem Salihaj (ish-deputet i LDK-së) që nuk e ka kundërshtuar demarkacionin dhe koalicionin me PDK-në, të mos dijë për fatin e tij. Edhe pse u raportua se emri i tij nuk është futur në listë, ai sot ka deklaruar se nuk ka asnjë informacion zyrtar në lidhje me këtë çështje, ndërsa shpreson se do të jetë brenda listës së kandidatëve të LDK-së.
“Nuk kam asnjë informatë zyrtare të konfirmuar lidhur me listën e LDK-së për deputetë. Po spekulohet shumë për diferencime, por nuk dua të besoj se partia ime e vlerave të mëdha demokratike do të bëjë diferencime të tilla, sepse ato, para së gjithash, do ta dëmtonin shumë vetë LDK-në në procesin zgjedhor që është para nesh”, ka deklaruar Salihaj.
Lënia jashtë e disa kandidatëve po ndikon që të fshehën listat
Opininionisti Islam Kransiqi ka thënë për tesheshi.com se në të dy blloqet e këtyre koalicioneve janë bërë kompromise të dhimbshme për vetë partinë, ku një parti e vogël ndanë kulaçin në pjesë të barabarta me një parti e cila është ¾ më e madhe së ajo, duke lenë jashtë listave individë që kanë kontribuar në atë subjekt më vite të tëra dhe kanë frikë se i ndëshkon qytetari kur të afrohet të kutia e votimit.
“Nuk është e logjikës së shëndoshë që partia që ka mbi 25 apo 30 deputetë, të pajtohet me një subjekt që i ka 5 apo 10 deputetë, që ta ndajë pushtetin 50/50, apo duke i dhënë edhe më shumë nga njëra anë dhe duke mos i renditur në listë deputetët me bagazh të lartë, vetëm pse menduan ndryshe dhe publikimi i listave mund t’i dëshpërojë votuesit me përmbajtjen dhe renditjen e emrave brenda saj, ku mungojnë të zgjedhurit e tyre, dhe subjektet nuk janë akoma gati për t’u përballur më realitetin të tillë, lidhur më këto koalicione”, thotë Krasniqi.
Ai thotë se mospublikimi i këtyre listave mund të bëhet edhe për shkak se mund të ketë kandidatë për deputetë që kanë raste të hapura nëpër gjykata.
“Nuk mund të përjashtohet mundësia së brenda këtyre listave ka individ të cilët kanë dosje ende të hapura nëpër Gjykata, dhe frika nga presioni i Bashkësisë Ndërkombëtare, mund që t’i largojë individ të caktuar nga këto Lista, individ të cilët kanë fuqi brenda subjekteve ku gjenden ata”, theksoi Krasniqi. /tesheshi.com/
