1-1 ka përfunduar takimi i luajtur në nisje të së shtunës në Buenos-Ajres mes Argjentinës dhe Brazilit. E shtyrë një natë më herët për shkak të rreshjeve, përballja e dy prej skuadrave më të mira të globit ishte në kuadër të ndeshjeve kualifikuese për në botërorin e 2018-ës.
Edhe pse pa Messi-n, i munguar për arsye dëmtimi, Argjentina do të zhvillonte një 45-minutësh të parë të mirë, por pa mundur të shënonte më tepër se një herë në portën e Brazilit.
Lavezzi do t’i kalonte vendasit në epërsi në minutën e 34-t. Hyrja e Douglas Costa-s do t’i jepte ritëm lojës së brazilianëve në pjesën e dytë, që e gjejnë golin e barazimit në minutën e 58-të. Lucas Lima shënon golin e tij të parë për Brazilin.
Edhe pse pati më tej raste për të dyja skuadrat, rezultati nuk ndryshoi. Në fund nuk do të mungonte dhe nxjerrja jashtë me dy kartona të verdhë e David Luiz-it, mbrojtësit të Brazilit. Ndërsa lojtari më i mirë në fushë qe argjentinasi Angel Di Maria.
Barazimi e lë Argjentinën në një pozitë jo fort të këndshme në këto kualifikuese, me vetëm dy pikë pas tre ndeshjesh. Të martën vijon një tjetër ndeshje e vështirë, ajo ndaj Kolumbisë, e për më tepër, në fushë kundërshtare.
Brazili, në anën tjetër, mban aktualisht një vend të katërt mes dhjetë skuadrave. /tesheshi.com/
