Një lajm se përfaqsuesja e BE-së në Tiranë, Romana Vllahutin ka blerë një vilë disamilionëshe në një bllok rezidencial në periferi të Tiranës, ka gëluar këtë të enjte në disa media afër opozitës, duke përfshirë madje dhe një afër pushtetit, aksioner kryesor i së cilës është djali i deputetes Arta Dade. Madje ka qenë pikërisht kjo media e cila i ka mëshuar më fort këtij fakti. Dhe kjo ndodh në prag të nisjes së procesit të vettingut, atij që pritet të pastrojë Drejtësinë e fëlliqur shqiptare nga qelbi i korrupsionit.
Vetë znj. Vllahutin nuk ka reaguar, derisa në mbrëmje ka ardhur një reagim nga vetë Brukseli zyrtar, sigurisht duke i dalë në mbrojtje.
“Vendimi për të zgjedhur rezidencën e Kreut të Delegacionit të BE-së në Shqipëri erdhi si konkluzion i një analize tërësore, që përfshiu një vëzhgim të tregut, një vlerësim nga një ekspert i pavarur dhe këshillimin e Oficerit Rajonal të Sigurisë së EEAS (Shërbimit të Veprimit të Jashtëm Evropian) në lidhje me aspektet e sigurisë.
Ky ishte opsioni më i mirë lidhur me raportin e përgjithshëm cilësi/çmim dhe përmbushjen e nevojave të ndërtesës si rezidencë e Kreut të Delegacionit të BE-së, si siguria, lehtësirat dhe afërsia me Delegacionin e BE-së.
Vendimi u miratua nga Autoriteti Buxhetor i BE-së në Janar 2015. Është e një rëndësie shumë të madhe për institucionet e BE-së që buxheti të jepet në mënyrë korrekte, transparente dhe me raportin më të mirë cilësi-çmim”, thuhet në reagimin e zëdhënëses së Mogherinit, shefes së diplomacisë së BE-së.
Si Vllahutin e si Lu, dyshja e investuar fuqishëm për Reformën në Drejtësi në emër të qendrave politike nga vijnë, Uashingtonit dhe Brukselit, janë sulmuar rregullisht nga disa segmente mediatike, por dhe politike që qëndrojnë pas tyre, që pa u miratuar reforma, e në vazhdimësi pasi ajo kaloi në parlament, përgjatë çdo procesi që ka ndjekur. /tesheshi.com/
