Nga Mark Brunga
Në anë të një prej rrugëve qendrore të qytetit të Durrësit të njohur me emrin “Aleksandër Goga”, gjendet një objekt i vjetër i dëmtuar dhe i lënë në afërsi të kazanit të plehrave. Bëhet fjalë për një qyp të vjetër, mosha e të cilit nuk mund të datohet ekzaktësisht pa një specialist të aftë të këtyre objekteve, por ajo që të bën përshtypje është indiferenca me të cilin përcillen ngjarje të tilla në Durrës.
Qypi i vjetër me moshë mbase edhe 2000-vjeçare ka mbi një javë që vegjeton i gjymtuar aty anë rruge, pa shqetësuar askënd. Nuk duhet harruar se zona ku ndodhet sot objekti është një zonë nga më intensivet arkeologjike e lagjes nr. 11, ku është gjendur dhe një lagje e vjetër romane si dhe kryqi i meandrit. Dhe vetë qypi i vjetër i thyer është vetëm pak metra larg zonës së kryqit të meandrit ose svastikës. Nuk dihet se si ka përfunduar në këtë gjendje.
Nga strukturat e pareteve anësore të qypit duket se ai ka qënë solid në stukturën e tij dhe mund të jetë thyer ose nga rrëzimi ose nga ndonjë goditje të fortë mbi të. Po koha e thyerjes nuk duket e largët. Mbase është dëmtuar para një jave kur dhe e hodhën në rrugë. Dhe ai ka mbetur aty i braktisur.
Mund të jetë shikuar në këtë gjendje nga qindra persona, por askush nuk ka bërë ndonje telefonatë në muze a gjetkë në zyrat qeveritare për ta marrë e për ta parë për vlerat që ka, si dhe për ta riparuar dhe konservuar, si pjesë të trashëgimisë kulturore të Durrësit.
Po ky qytet, tashmë pas rrënimeve të mëdha në kurriz të pasurive arkeologjike që ka pësuar gjatë tranzicionit, duket sikur është bërë indiferent për vlerat e tij të papërsëritëshme historike, sa ka filluar që të hedhë në mes të rrugëve objekte të historisë së tij…/tesheshi.cm/
