Agron Duka, kreu i Agrares, aleat me Lulzim Bashën, i ka bërë thirrje këtij të fundit që të njohë fitoren e Ramës e të mos vijojë me akuza.
Politikani shijakas që në 2005 do telefononte rivalin Olldashi për t’i uruar fitoren, pasi e pati të ndjerin rival të drejtpërdrejtë në Shijak, po kërkon tashmë që Basha të bëjë të njëjtën gjë me Ramën.
“Nuk dua të diktoj mendimin Tim, por si Kryetar i PAA duke shprehur edhe mendimin e Kryesisë së PAA , marr përsipër gabimet e bëra dhe i uroj kundërshtarit politik suksese në qeverisjen e ardhshme.
Dëshiroj me gjithë zemër që Partia Demokratike dhe Lulëzim Basha të nxjerin mësimet e duhura nga kjo humbje dhe të fitojnë në ndeshjen e rradhës.
Urojmë fituesit për katër vitet e ardhshme dhe të punojmë të gjithë bashkë për një opozitë të fortë e konstruktive duke udhëhequr vendin në proçeset integruese”, shkruan Duka, duke dalë kësisoj nga rreshtimi opozitar këto ditë.
Sipas tij, fitorja e Ramës duhet të shihet dhe si “e mirë publike”.
“E nis këtë qëndrim duke uruar Partinë Socialiste për fitoren në zgjedhjet e 25 Prillit.
Në jetë jam rrëzuar shumë herë, por jam ringritur po aq herë. Kam dërmuar gjunjët, por nuk më ka lejuar zemra të thyhem. E kam bërë për herë të parë në zgjedhjet e 2005-ës kur isha i pari kandidat socialist që u ndjeva fitimtar duke njohur kundërshtarin si fitues.
E kam bërë gjithmonë në këto vite dhe do të vazhdoj ta bëj sërish si pjesë e një morali që tenton të gjejë arsye dhe të drejtë edhe tani mbas 25 prillit, sepse jam i bindur se suksesi i mundshëm i qeverisjes së rikonfirmuar të Edi Ramës nuk është medalje për të, por një e mirë publike”, argumenton Duka.
Për njeriun që dikur quhej nga Berisha si “Duka e krimit”, Basha duhej të shoh ku i ka gabimet vetë për humbjen.
“Nëse humbësi nuk ka forcën morale t’i japë dorën fituesit është i dënuar të humbasë përsëri
E kam ndjekur Lulëzim Bashën edhe kur nuk kam patur të njëjtin mendim, nuk kam qënë në asnjë moment dakort me djegjen e mandateve, as me bojkotimin e zgjedhjeve vendore por prapë së prapë kam respektuar gjithnjë vendimmarrjen brenda koalicionit.
Këto vendime të gabuara na kushtuan shumë. Nuk mund të fajësojmë kundërshtarin politik përse përfitoj nga gabimet tona por përkundrazi, duhet të korrigjohemi për të mos i përsëritur ato në të ardhmen edhe pse unë i kam konsideruar të gabuara ato vendime e jam dakortësuar me ndërgjegje të plotë dhe për këtë fajësoj veten dhe jo të tjerët
‘Na vodhën, na shtypën, na sakatuan, prandaj do vazhdojmë avazin e vjetër’, kjo nuk është strategji pozitive për Ne, por më këtë le të merret drejtësia”, shkruan Agron Duka. /tesheshi.com/
