Tashmë politika shqiptare, në anën më të shëmtuar të saj, nuk mund të kuptohet pa duelin Berisha – Balla, ku, pasi nuk u doli salla e parlamentit, tashmë janë zhvendosur dhe në një komision, siç është që po heton privatizimin e ÇEZ-it. Berisha dihet kush është, por ia vlen që të rifreskohet kujtesa në lidhje me Taulant Ballën, njeriun e ardhur nga fundi i epokës Nano….
Taulant Balla ka ardhur në Tiranë në vitin 2002 fill pas studimeve universitare në Rumani për Shkenca Politike. Ai nisi punën në selinë e PS-së, një punë e mundësuar nga kontributi i të atit në këtë parti në degës e Librazhdit. Puna e tij e parë ka qenë asistent i Fatmir Xhafës, që atë kohë drejtonte Departamentin për Marrëdhëniet Ndërkombëtare në PS.
Pa kaluar disa muaj, djali i ri i PS-së tregoi se i kishte idetë e qarta për të ecur në karrierë. Ai bë këshilltar i kryeministrit të atëhershëm Fatos Nano, punë që do të ndikonte më tej për katapultimin e tij politik, por për çudi kjo periudhëështë e fshirë nga jetëshkrimi i tij zyrtar në faqen e Kuvendit.
Viti 2005 do të shënonte rrëzimin e Nanos, por ngritjen e Ballës drejt karrierës politike. Ai bë deputet i Librazhdit, ndërkohë që Partia Socialiste doli në opozitë.
Konflikti me Berishën që e forcoi politikisht
“Nën emrin e Xenit po vihen gjoba ndaj bizneseve”- kjo ishte akuza e parë që deputeti i ri i PS-së lëshoi drejt liderit demokrat dhe kryeministrit Berisha, akuzë që e pozicionoi menjëherë Taulantin si kundërshtar të Sali Berishës. Konflikti mes tyre ka ardhur vetëm duke u agravuar me akuza dhe fyerje të ndërsjella, pasi Berisha nuk mund të pranonte të “prekej” tek familja, kësisoj përdori të njëjtën kut në hakmarrje- familjen, duke kaluar madje në fyerje personale për motrën e deputetit socialist. Familja Berisha, i biri Shëlzeni dhe dhëndri Jamarbër Malltezi, nisën një fushatë sulmesh mediatike dhe gjyqësore ndaj tij.
I gjithë ky rrugëtim akuzash vetëm sa do ta fuqizonte Taulant Ballën politikisht duke marrë brenda partisë së tij në opozitë(edhe në mungesë të kryetarit Rama në Kuvend 2005-2009) “pishtarin” e kundërshtarit politik të Sali Berishës.
Në këtë mënyrë Balla do tëçimentoste vendin e tij në grupin parlamentar të PS-së për t’u rizgjedhur në vitin 2009 e më tej në vitin 2013. Me ardhjen në pushtet të PS-së ai nuk do të hiqte dorë nga kundërshtari i tij i vjetër, përkudrazi…
Duke qenë se roli parlamentar i Berishës (edhe pse i dorëhequr nga drejtimi i partisë) vazhdon të jetë kryesor Balla ishte i duhuri nga kampi i socialistëve për tëvijuar betejën anti-Berisha.
Kështu, partia i caktoi role me rëndësi politike në disa komisione hetimore, më i fundit ai i ngritur për hetimine aferës së ÇEZ-it, ku dyshja Balla-Berisha arritën pikën kulmore të konfliktit të tyre politik.
Njëri në rolin e prokurorit dhe tjetri në rolin e të pandehurit, dëshmia e Berishës në komisionin hetimor të drejtuar nga Ballës, ishte një spektakël i vërtetë politik.
Aksioma; sa më fort ta luftosh kundërshtarin politik, aq më fort të duan brenda partisë tënde u vërtetua e socialistit që po i bën ballë Sali Berishës (kundërshtari 26 vjeçar i sëmajtës). Ai është profilizuar si luftëtari i vijës së parë të frontit në PS duke iu përshtatur “armëve të luftës” që kërkon kundërshtari.
Nuk e dimë akoma se çfarë profili do të kishte një Taulant Ballë, i cili sot zë foltoren e Kuvendit dhe replikon me epitete e batuta kur mos të ketë një Berishë përballë, apo kur t’i duhet të kryejë një detyrë administrative, si ministër, fjala vjen. /tesheshi.com/
