Nga Blendi Gashi
Për vite me radhë, Hashim Thaçi u kritikua jashtëzakonisht shumë nga jo pak zyrtarë të Aleancës për Ardhmërinë e Kosovës (AAK), por kritika jo të vogla adresoi edhe vet kreu i kësaj partie, Ramush Haradinaj gjatë kohës sa ishte në opozitë.
Por me të marrë pushtetin gjërat kanë ndryshuar rrënjësisht dhe tashmë zyrtarët e AAK-së janë bërë miq të Thaçit, duke harruar plotësisht kritikat e shumta e protestat që organizuan ndaj presidentit aktual.
Ramush Haradinaj, Donika Kadaj-Bujupi, Pal Lekaj, Ardian Gjini, Teuta Haxhiu, Time Kadrijaj, një javë më parë u ulën në një tryezë për të festuar Pashkët në shtëpinë e ministrit katolik Pal Lekaj, me “armikun” e tyre në krye të Presidencs. U harruan kritikat e armiqësia, koha ishte për buzëqeshje e festë.
Por cilat ishin akuzat më të mëdha që Ramushi dhe zyrtarët e tjerë të AAK-së adresuan ndër vite ndaj Thaçit.
Më 3 prill të vitit 2009, Haradinaj si opozitar në një konferencë të mbajtur në zyrat e AAK-së, lëshoi akuza të rënda në drejtim të kryeministrit Hashim Thaçi dhe qeverisë që udhëheq ai.
Emërimin e Bekim Çollakut si shef të stafit të kryeministrit, Haradinaj e quajti si shkelje ligjore, vendim të marrë në mënyrë arbitrare dhe me pagë diskriminuese.
Haradinaj shkoi më tej duke thënë se emërimet në qeveri (Thaçi 1) dhe në ndërmarrje publike bëhen në mënyra kriminale dhe klanore për t’i shërbyer korrupsionit.
Në qershor të 2013-tës, Haradinaj në Kuvendin e Punës së Degës së AAK-së në Prishtinë deklaroi se “qeverisja e udhëhequr nga kryeministri, Hashim Thaçi, është e një kualiteti të dobët dhe se kjo qeveri ka dështuar të arrijë sukses, duke bërë që në shumë sektor të ketë vetëm regres”.
Më 8 prill të 2014-tës, Haradinaj gjatë takimit më përfaqësues të Odës Ekonomik Gjermane, dhe përfaqësues të bizneseve, pati thënë se “qeveria Thaçi ka dështuar plotësisht në ekonomi. Nuk ka pasur investime, janë larguar investitorët dhe nuk do të jetë i lehtë kthimi i besimit që Kosova është serioze”.
Më kritike se Haradinaj ndaj Thaçit është paraqitur Donika Kadaj-Bujupi e cila la VV-në për t’u rikthyer në AAK.
Më 3 gusht të 2016-tës, sa ishte pjesë e VV-së ajo deklaroi se “Thaçi duhet të jetë në burg e jo të flasë për Demarkacionin”.
Më 1 gusht të 2017-tës, në një konferencë për media nga selia e VV-së akuzoi Thaçin dhe Blerand Stavilecin si njerëz të lidhur me mafian serbe të energjisë
Më 9 mars të 2017-tës, Kadaj-Bujupi foli për transformimin e FSK-së e tha se “Thaçi nuk është presidenti im”.
Edhe njeriu që e priti në familje Thaçin, ministri Pal Lekaj si opozitar ka bërë jo pak kritika ndaj presidentit aktual.
Më 27 janar të 2017-tës, kur autoritetet franceze arrestuan Ramushin me urdhërarrest të Serbisë, Lekaj, përmes një letre të hapur e quajti Thaçin dhe atë kohë kryeministrin Mustafa si “pashallarë”, ku i kritikoi për mosreagim ndaj arrestimit.
Më 16 dhjetor të 2016-tës, përmes një postimi në Facebook e kritikoi Thaçin për mosliberalizim të vizave dhe për mospërmbushjen e premtimeve për 200 mijë vende pune.
Ardian Gjini, kreu aktual i Gjakovës sa ka qenë deputet si opozitar ka kritikuar jo pak Thaçin.
Më 8 nëntor të vitit 2011, si opozitar, Gjini në një nga seancat plenare ku po diskutohej për Raportin e Progresit për Kosovën, tha e “qeveria Thaçi e ka ngulfatur sistemin në vend dhe me këtë qeveri nuk ka gjasa të ecet tutje, ndërsa nuk ka sundim të ligjit dhe mbrohen shokët e Thaçit, të cilët janë nën hetime”.
Pas kësaj deklarate të tij, atë kohë kryeministri Thaçi gjatë replikës foli për “pasoja legale dhe politike”.
Gjini, këtë fjalor të Thaçit e konsideroi si kërcënim, pasi sipas tij kur atij i thuhet publikisht për pasoja legale e politike pse po fol e kritikon, imagjino sipas tij çfarë mund t’ju ndodh të tjerëve me “sms” e telefonata.
Kurse më 19 shkurt të 2017-tës, në një dokumentar Gjini tha se “gjithçka që bën Thaçi e bën veç për vete”.
Deputetja e AAK-së Teuta Haxhiu, më 27 nëntor të 2015-tës e quajti “burrec” Thaçin duke akuzuar atë dhe Isa Mustafën për arrestimin e koleges së saj Donika Kadaj-Bujupi.
Më 6 dhjetor të 2016-tës, Haxhiu në një emision televiziv tha se Thaçi është fajtori kryesore për degradimin dhe politizimin e arsimit.
Më 26 shkurt 216, në seancën plenare kur po zgjedhej presidenti, Haxhiu deklaroi se “Hashim Thaçi nuk është personi që i duhet president të Kosovës”, duke shtuar se ai i ka sjellë vetem tri njohje të vendit e ka dështuar në antërësimin e Kosovës në UNESCO.
Më 23 janar të 2017-tës, deputetja Time Kadrijaj shkroi në llogarinë e saj në Facebook se “presidenti Thaçi po provon që t’i ikë Gjykatës Speciale duke manovruar me ‘pleq e dialog me Serbinë’”.
Kurse më 8 mars të 2017-tës po përmes një shkrimi në Facebook, reagoi pas konferencës së mbajtur nga presidenti Thaçi për ushtrinë, me ç’rast deklaroi se nuk ka kuptuar nëse po bëhet ushtria apo jo, duke i thënë “lej hajgaret mos luaj me ndjenjat tona”. /tesheshi.com/
