Pas Kreut të Shërbimit Informativ Shtetëror, në Komisionin parlamentar të Sigurisë Kombëtare është thirrur në një seancë dëgjimore Drejtori i Përgjithshëm i Policisë së Shtetit, Haki Çako. I vënë para pyetjeve të anëtarëve të komisionit, Çako ka deklaruar me bindje se në Republikën e Shqipërisë nuk ka, nuk ka pasur dhe nuk do të ketë kurrë pajisje përgjimi, për aq kohë sa në këtë republikë është ky legjislacion që ia ndalon ligjërisht policisë aksesimin e kësaj pajisje.
Çako u shpreh se përgjimi bëhet vetëm mbi bazën e pajisjeve dhe procedurave të ligjshme. Anëtari i Komisionit parlamentar të Sigurisë Kombëtare, Asllan Dogjani, i drejtoi Z. Çako një sërë pyetjesh që vijojnë si më poshtë:
“A ka qenë një pajisje në Vlorë dhe a është përdorur ajo për trajnimin e punonjësve të policisë? Ku ndodhet aktualisht kjo pajisje? A është në Vlorë ende apo ka lëvizur? Në sa vende është vendosur kjo pajisje, pasi nga të dhënat që kemi, pas Vlorës është vendosur edhe në Tiranë dhe është përdorur nga forcat operacionale. Kjo pajisje është përdorur për ndjekjen e personave në kërkim. Ju si Drejtor i Policisë, e dini se edhe për gjurmimin e telefonave duhet të merret leje në prokurori? Nëse është përdorur kjo pajise, a është marrë leja në prokurori dhe në gjykatë? Kush i ka trajnuar punonjësit e policisë që ka bërë trajnimet dhe ç’rol ka Interforza në këtë proces? Sa persona në kërkim janë kapr, nëse e keni përdorur pajisjen për përgjimin e personave në kërkim?”, – pyeti z. Dogjani.
Përpara se të përgjigjej Drejtori Çako, fjalën e mori anëtari i Komisionit, Paulin Sterkaj, i cili u shpreh se pyetjet ishin të pabaza, duke qenë se vetë Çako deklaroi që në fillim që nuk ka pasur pajisje përgjimi.
“Ky thotë që s’ka pajisje, ju e pyesni a është përdorur. Drejtori kaq informacion ka. Çështja është në hetim. Kaq mund të thotë për momentin. Pse nuk erdhi Prokurori i Përgjithshëm në ballafaqim në komision? Se çështja është në hetim. Ju keni bërë një akuzë publike, por nuk keni asnjë lloj materiali”, – tha Sterkaj.
Nga ana e tij, Drejtori i Policisë së Shtetit, Haki Çako bëri me dije se policisë nuk i lejohen përgjimet telefonike.
“E gjithë veprimtaria e policisë orientohet dhe mbikqyret nga prokuroria. Për çështjen në fjalë, lidhur me pyetjet që bëri zoti Dogjani, duhet të them se unë kam vënë në dispozicion të gjitha kapacitetet për njerëzit që merren me veprimtarinë ligjore të gjurmimit. Kam vënë në dispozicion të prokurorisë gjithë informacionin për të hedhur dritë mbi këtë çështje. Policia e Shtetit nuk ka administruar asnjëherë asnjë inventar, as në përdorim dhe as në administrim të tillë pajisje. Jemi në partneritet të plotë me shumë misione të huaja që asistojnë në Policinë e Shtetit. Policia e Shtetit nuk ka pasur, nuk ka dhe nuk ka si të ketë pajisje në kundërshtim me ligjin”, – tha ndër të tjera përpara anëtarëve të Komisionit parlamentar për Sigurinë Kombëtare, Haki Çako. /tesheshi.com/
