Sezoni i rregullt po i afrohet fundit në aktivitetin numër një të basketbollit të meshkujve për klube në Europë. Java e parë e prillit do të jetë dhe e fundit për 16 skuadrat që për muaj të tërë po luftojnë për t’u renditur mes tetë vendeve të para, që i çojnë në play-off.
Një tjetër ritëm ka Euroleague, shpesh me ndeshje të njëpasnjëshme brenda një jave, siç ngjet dhe këto ditë. Të martën e të mërkurën janë luajtur takimet e javës së 27-të, për t’ua lënë radhën atyre të javës së 28-të sot e nesër.
Nga kryesuesit, zhgënjimi më i madh qe Fenerbahçe, që në shtëpinë e vet u mposht 79-91 nga Makabi i Tel-Avivit. Në të kundërt me të, pati fitore për CSKA-në e Moskës, Realin e Madridit dhe Olimpiakosin.
Rusët pritën Darushafakanë dhe fituan 95-85, madrilenët u përballën me katalanasit e Barcelonës dhe i mundën thellë, 85-69, ndërsa skuadra greke triumfoi në Beograd ndaj Crvena Zvezdës, 64-66.
Ndeshja kulmore e kësaj të enjteje është derbi i Stambollit, Anadollu Efes – Fenerbahçe, ndjekur mbrëmjen e së premtes nga një përballje po kaq drithëruese, Olimpiakos – Real i Madridit.
Mes 16 skuadrave kryesojnë Reali i Madridit dhe CSKA e Moskës, me nga 20 fitore e 7 humbje. Së bashku me to, kualifikimin e kanë siguruar dhe Olimpiakosi, Fenerbahçe, Baskonia Vitoria Gasteiz e Panathinaikosi. /tesheshi.com/
