Eshtë mbyllur në barazim 2-2 derbi i Milanos, ashtu siç nuk e priste askush pas mënyrës se si kishin rrjedhur ngjarjet deri kur ndeshja po i afrohej fundit.
Një derbi i çuditshëm, pa Massimo Moratti-n, Silvio Berlusconi-n apo Adriano Galliani-n në ekran. Tanimë në duart kinezësh, kamera kapte gjatë gjithë kohës vetëm portretet e poseduesve të rinj të dy klubeve të Milanos.
Rezultati do të ishte kopje e derbit të fazës së parë, me dramën të ofruar po ashtu në fund të lojës.
Pjesa e parë do të fliste për Interin, që do të kryesonte 2-0. Më së pari do të shënonte Candreva; rezultati do të thellohej nga Icardi në mbarim të kësaj pjese.
Lojtarët e Milanit kujtohen të luajnë nga fundi i lojës, me shpresat e tyre të ngjallura në minutën e 83-të. Romagnoli zgjat këmbën brenda zonës dhe shkurton diferencën.
Këtu derbi nis e merr vërtet aromë derbi. Nuk mungojnë përplasjet, shkelmat. Në fund, pesë minuta shtesë. Të gjithë mbajnë frymën kur shtohen dy minuta të tjera nga gjyqtari i lojës. Në të fundit goditje nga këndi, në të 97-tën minutë, Zapata barazon fatmirësisht për Milanin, e fatkeqësisht për Interin.
Me golin mbyllet dhe loja nga Orsato, që fishkëllen menjëherë pasi topin përfundon në rrjetë.
2-2! Aq sa përfundonte derbi dhe më 20 nëntor, kur ndryshonte vetëm kahu ku luhej drama. Atëherë barazonte Perisic në minutën e 92-të! /tesheshi.com/
