Nga Ylli Pata
Bashkimi Europian i ka kthyer përgjigje negative Partisë Demokratike në lidhje me vërejtjet e ekspertëve të opozitës për ligjin e vettingut.
Siç mësohet, misioni i EURALIUS-IT i ka cilësuar kërkesat e opozitës si jashtë kontekstit të konceptit të vettingut që përcakton tashmë Kushtetuta e Republikës e ndryshuar natën e 21 korrikut.
PD ka kundërshtuar rolin e DISK, Drejtorisë së Informacionit të Klasifikuar dhe Inspektoratin e Deklarimit dhe Kontrollit të Paurive, ILKPDKI në çështjen e kontrollit dhe vlerësimit të gjyqtarëve dhe prokurorëve.
Por ekspertët e EURALIUS kanë bërë të ditur se këta institucione janë pjesë normale të filtrave dhe kjo është pranuar edhe në ndryshimet kushtetuese, por edhe nga Komisioni i Venecias.
Drafti i plotë i rekomendimeve të BE-së është dorëzuar në Komision dhe pritet që të ketë debate gjatë ditëve në vazhdim.
Anëtari i Komisionit të Reformës Zgjedhore, ish-kryeministri Pandeli Majko, në një deklaratë të sotme, ka qenë në një linjë, edhe pse nuk bëri të ditur për raportin e BE-së.
Majko tha se nuk do të devijohet nga projekti që u miratua në ndryshimet kushtetuese.
“Ne në komision po diskutojmë mbi një logjikë të re, jo atë të dispozitave kushtetuese, por atë të zbatimit të dispozitave që i kemi ndryshuar në Kushtetutë”, tha Majko për mediat pas mbledhjes, ku janë dëgjuar opinionet e ekspertëve ndërkombëtarë rreth propozimeve të opozitës për ligjin e vettingut.
Majko tha se roli i operacionit ndërkombëtar të monitorimit do të jetë po ai rol i shkruar në aneksin kushtetues.
“Është një rol që përcaktohet qartë në aneksin kushtetues dhe ne nuk do i lëvizim asnjë presje”, tha deputeti socialist.
Sa i takon procesit të verifikimit të pasurive të gjyqtarëve dhe prokurorëve shqiptarë, në kuadër të vettingut, Majko tha se ky proces do të bazohet në opinionin e Komisionit Europian dhe se atë do ta kryejnë institucione që kanë një eksperiencë kushtetuese, që në këtë rast është Inspektoriati i Lartë i Deklarimit dhe Kontrollit të Pasurive. “Ne nuk do të përpiqemi të bëjmë shpikje”, shtoi Majko.
Në projektligjin për vettingut theksohet se gjyqtarët apo prokurorët që do të kalojnë në sitë kanë të drejtë të japin dorëheqjen, deri përpara se t’i jepet vendimi përfundimtar në seancën dëgjimore.
Në këtë rast, ndaj subjektit pushohet procedura e rivlerësimit dhe atij i akordohet pension i veçantë.
Subjektet që japin dorëheqje nuk kanë të drejtë të emërohen për një periudhë të përcaktuar, në asnjë prej organeve të sistemit të drejtësisë, siç parashikohen në këtë ligj.
Këto subjekte nuk kanë pengesa për t’u punësuar në administratën publike, për sa kohë ligjet e posaçme nuk kanë kufizime. /tesheshi.com/
