Nga Blendi Gashi
Opozita kosovare do të rikthehet në Kuvend pas një bojkoti të gjatë.
Lëvizja Vetëvendosje, Aleanca për Ardhmërinë e Kosovës dhe NISMA për Kosovën janë dorëzuar dhe të enjten deputetët e këtyre partive do të rikthehen në karriget e tyre, për seancën e nesërme solemne për vizat, jo për të hedhur gaz, por për të dëgjuar fjalimin e përfaqësueses së lartë të Bashkimit Evropian, Frederica Mogherini.
Por, ky rikthim i opozitarëve do të ndodh veç për shkak të vizave dhe bojkoti do të vazhdoj pasi ata nuk do të marrin pjesë në seanca të rregullta ku në rend dite do të jenë projektligje të ndryshme.
AAK e NISMA konfirmojnë rikthimin në Kuvend
Anëtari i Kryesisë së AAK-së, Muharrem Nitaj, ka thënë për tesheshi.com se deputetët e kësaj partie do të jenë nesër në seancë.
“Në pjesën ceremoniale ku do të jetë e pranishme edhe Përfaqësuesja e Lartë e Bashkimit Europian, Federica Mogherini, deputetët e AAK-së do të jenë në seancë”, ka thënë Nitaj.
Edhe deputetët e Nismës për Kosovën do të jenë në seancën e së enjtes. Këtë e ka konfirmuar deputeti Enver Hoti për tesheshi.com.
“Po, NISMA nesër do të marr pjesë në seancën solemne. Do të marrim pjesë veç në pjesën për vizat”, ka thënë deputeti Hoti, për tesheshi.com.
VV: Rekomandimi për liberalizim të vizave, një shancë për regjimin e korruptuar
Portali tesheshi.com ka kontaktuar edhe me Lëvizjen Vetëvendosje e cila ka konfirmuar pjesëmarrjen në seancën solemne.
“Lëvizja Vetëvendosje do të merr pjesë në seancën e nesërme për shkak se është seancë solemne, dhe në seanca të tilla kemi marrë pjesë edhe më herët”, ka thënë Adonis Tahiri, për tesheshi.com.
Tahiri, më tej ka thënë se rekomandimi për liberalizim nuk është liberalizim automatik, kështu që i jepet edhe një shancë, siç thotë këtij regjimi të korruptuar që ta prishë punën.
“Qeveria i gëzohet liberalizimit të vizave për arsyen e kundërt me qytetarët. Përderisa qytetarët duan që të jenë më afër familjarëve të tyre të shumtë, Qeveria do që njerëzit të jenë sa më larg Kosovës dhe sa më pak në Kosovë. Ne shpresojmë se rekomandimi për liberalizimin e vizave të qytetarëve të Kosovës të ndodhë, për të mirën e qytetarëve. Mirëpo, ne duhet të këmbëngulim që trajtimi i vendeve të ndryshme të Ballkanit të bëhet i njëjtë për të gjithë, dhe jo të përdoren kute të ndryshme varësisht nga ndikimi e interesat. Shikuar nga kjo perspektivë, me liberalizimin e vizave tashmë jemi vonë”, ka thënë Tahiri.
Ndryshe, Komisioni Evropian miratoi sot propozimin për liberalizimin e vizave për Kosovën.
Megjithatë, Komisioneri i Bashkimit Evropian për Punë të Brendshme, Dimitris Avramopoulos, pas dhënies së rekomandimit për dhënien e vizave për Kosovën tha se kjo nuk do të thotë se kosovarët do të kenë drejtë migrimi.
/tesheshi.com/
