Presidenti i sapozgjedhur i Shteteve të Bashkuara Joe Biden zyrtarisht mori miratimin e agjencisë federale për të filluar transferimin e kompetencave presidenciale tek ai menjëherë pasi shteti “swing” i Michiganit e shpalli atë fitues të zgjedhjeve presidenciale atje.
Administrata e Përgjithshme e SHBA (GSA), e cila duhet të vërtetojë tranzicionin presidencial, i tha të hënën Presidentit të zgjedhur Biden se mund të fillojë zyrtarisht transferimin e pushtetit.
“Unë e marr këtë rol seriozisht dhe, për shkak të zhvillimeve të fundit që përfshijnë sfida ligjore dhe konfirmimin e rezultateve të zgjedhjeve, unë po dërgoj këtë letër sot për t’ju vënë në dispozicion fonde dhe shërbime”, shkroi Emily Murphy, kreu i agjencisë federale në një letër për Biden.
Më herët, Presidenti në largim Donald Trump shkroi në Tëitter se ai rekomandoi Murphy-n dhe ekipin e saj “të bënin atë që duhet bërë në lidhje me protokollet fillestare dhe se ai gjithashtu i tha ekipit të tij ta bënte këtë”.
Kritika ndaj të dy palëve
Vendimi i Murphy-t, i miratuar nga Trump dhe i cili u kritikua nga të dy palët, u njoftua pas përpjekjeve të dështuara të presidentit actual republikan për të sfiduar rezultatet e votimit. Kështu, Michigani konfirmoi fitoren e Biden-it dhe Pensilvania më herët refuzoi padinë e ekipit të Trump-it, i cili u përpoq të parandalonte konfirmimin e rezultateve në atë shtet.
Anëtarët e Kongresit dhe bota e biznesit kanë bërë presion mbi këtë agjenci federale pak të njohur në ditët e fundit, njohja zyrtare nga e cila e rezultateve të zgjedhjeve amerikane, është thelbësore për transferimin e pushtetit nga administrata Trump tek ekipi i Biden-it, i cili shihet si i rëndësishëm për sigurinë kombëtare dhe për fushat e tjera kryesore.
Më herët, GSA njoftoi se Murphy, e cila u emërua në këtë post nga Trump në vitin 2017, do të përcaktojë ose miratojë zyrtarisht transferimin e pushtetit pasi të jetë e qartë se kush është fituesi.
“Përkundër raporteve dhe insinuimeve të mediave, vendimi im nuk u morr nga frika ose favorizimi”, shkroi Murphy.
Takime me agjenci
Yohannes Abraham, drejtori ekzekutiv për tranzicionin në ekipin Biden-Harris, thotë se vendimi është një “veprim i fundit administrativ” për të filluar zyrtarisht procesin e tranzicionit në agjencitë federale.
“Zyrtarët e tranzicionit do të takohen me zyrtarë federalë në ditët në vijim për të diskutuar përgjigjen ndaj virusit koronar, duke marrë parasysh plotësisht interesat e sigurisë kombëtare,” tha ai.
Thurgood Marshall Jr, një ish-sekretar i kabinetit Clinton, tha se vonesa ishte “e paskrupullt” në një kohë kur Shtetet e Bashkuara po luftojnë me një pandemi të përshpejtuar COVID.
“Kjo do të sjellë ndryshime të mëdha për Biden kur bëhet fjalë për zhvillime të shpejta, sic është pandemia dhe shpërndarja e vaksinës tek njerëzit. Ky proces është jetësor për Shtetet e Bashkuara dhe botën,” tha ai.
Ai shton se Biden do të duhet të ketë mijëra takime me agjencitë për të lidhur përparësitë e tyre me administratën e ardhshme.
“Ata duhet të kompensojnë kohën e humbur, do të duhet shumë angazhim në javët e ardhshme”, shtoi më tej.
Konfirmim nga Michigani
Para vendimit të Emily Murphy-it, u njoftua se Komisioni Shtetëror i Zgjedhjeve në Michigan, të hënën konfirmoi rezultatet e zgjedhjeve presidenciale, të mbajtura më 3 nëntor, sipas të cilave demokrati Biden fitoi në këtë shtet.
Me këtë konfirmim, ka edhe më pak të ngjarë që përpjekjet e Trump-it për të sfiduar fitoren e Biden-it, duke pretenduar se kishte parregullsi dhe mashtrime zgjedhore në shumë vende, për të cilat ai nuk ofroi prova konkrete, të japin fryte.
Zgjedhësit nga të gjitha shtetet federale janë planifikuar të takohen në 14 dhjetor në kolegjin zgjedhor dhe të konfirmojnë zyrtarisht presidentin e ri. Biden fitoi 306 vota në zgjedhje, që është 36 më shumë se pragu i kërkuar i 270 votuesve. /tesheshi.com/
