Nga Blendi Gashi
Pas shumë premtimeve për anëtarësim në UNESCO dhe INTERPOL, diplomacia kosovare është zmbrapsur duke bërë të ditur se nuk do të aplikojë këtë vit për tu bërë pjesë e këtyre mekanizmave ndërkombëtarë.
Ministria e Jashtme që drejtohet nga Behgjet Pacolli mosriaplikimin në këta mekanizma ndërkombëtarë e quan “shtyrje pragmatike e mbështetur në koordinimin e plotë dhe të ngushtë me SHBA-të dhe vendet e tjera të Kuintit”, duke shtuar se “çdo pretendim tjetër për krijimin e narracionit negativ tek publiku është i paarsyeshëm dhe joprofesional”.
Përmes këtij arsyetimi qeveria e re përveç se mundohet të fshehë dështimin e saj, bëhet po ashtu jo e drejtë me opinionin pasi nuk pranon të thotë se mos riaplikimi në këto dy mekanizma bëhet për shkak të mungesës së votave dhe mos punës së vazhdueshme të diplomatëve.
“I kemi votat…”
Është vet Pacolli i cili me të marrë drejtimin e diplomacisë kosovare është shprehur tejet i bindur për anëtarësim në UNESCO, duke deklaruar se Kosova ka siguruar votat e mjaftueshme.
Pacolli në një intevistë për emisionin “Interaktiv” të KTV-së dhënë më 21 shtator të këtij viti, vetëm 12 ditë pas formimit të qeverisë ka deklaruar se se me pak ditë punë dhe me shumë takime që ka zhvilluar në SHBA ka siguruar vota të reja për anëtarësim në UNESCO.
Megjithatë, ai ka përmendur se si parakusht janë dy ligjet që duhet të kalojnë në Kuvendin e Kosovës, ligji për Liritë Fetare si dhe Ligji për Trashëgiminë Kulturore.
“Siç e dini Kosova duhet të aplikojë në UNESCO edhe pse jemi goxha vonë. Ka kaluar një kohë e gjatë dhe është bërë pak. Unë kam studiuar edhe strategjinë edhe mënyrën e punës si do të bëhet sigurimi i votave. Jam i inkurajuar dhe them se do të kemi votat për UNESCO. Sot kishim një takim shumë të rëndësishëm me një shtet mik që e ka njohur Kosovën dhe në bisedat me të, praktikisht Kosovës i janë garantuar mes 15 dhe 20 vota për UNESCO”, ka thënë ai.
“Ku u zhdukën votat e Pacollit?”
Por vetëm dy javë pas kësaj deklarate, MPJ që drejtohet nga Pacolli ka njoftuar për mos riaplikim për UNESCO për çka më pas është tallur keq nga presidenti serb Aleksandër Vuçiç.
“Ku u zhdukën 15 vendet e Behgjet Pacollit në sallën e ndërtesës së OKB-së në Nju Jork? Dy vjet të tjera, dhe unë mendoj se kjo nuk do të kalojë edhe pas dy vitesh të tjera”, ka thënë Vuçiç.
Ai ka thënë se mos aplikimi i Kosovës ka të bëjë në lidhje me mungesën e votave, përderisa ka bërë provokimin e radhës duke u shprehur i sigurt se Kosova nuk do t’i ketë votat për UNESCO as pas dy viteve.
“Unë jam kujdesur gjithmonë për një gjë të tillë dhe kam folur saktë për të vërtetën se kush e ka shumicën për UNESCO. Serbia do të jetë vigjilente dhe do të vazhdojë luftën që Kosova të mos anëtarësohet në UNESCO”, ka delaruar presidenti serb.
Pra vetë deklarata e Vuçiç konfirmon se votat janë arsyeja për mosriaplikim për UNESCO, ndaj diplomacia kosovare në vend të fjalëve të mëdha duhet të zgjodhet nga gjumi dhe të lobojë fuqishëm për të siguruar votat në mënyrë që të mos dalë e mundur sërish nga Serbia dhe të mos ketë rast Vuçiç të bëjë shaka si këtë herë.
Ndryshe në nëntor të vitit 2015 Kosova aplikoj për pranim në UNESCO mirëpo nuk kishte arritur të bëhej pjesë e kësaj organizate pasi që për anëtarësimin e Kosovës kishin votuar për 92 shtete kurse për t’u anëtarësuar i janë dashur 95 vota.
Tani Kosova duhet të pret deri në vitin 2019 pasi Asambleja e Përgjithshme e kësaj agjencie mblidhet një herë në dy vjet. /tesheshi.com/
