Qeveria e re portugeze e qendrës së djathtë është detyruar dje të japë dorëheqjen vetëm dy javë pasi ajo u betua. Hedhja poshtë e propozimeve të saj në parlament nuk i kanë lënë asnjë rrugë tjetër veç dorëheqjes.
Një shumicë e krijuar nga aleanca e Partisë Socialiste me Partinë Komuniste dhe me radikalët e Bllokut të Majtë bëri që propozimet e qeverisë të mos merrnin pëlqimin pas votimit në parlament. Humbja në votim solli dorëheqjen e pashmangshme të qeverisë.
Të djathtët e kryeministrit tashmë në ikje, Pedro Passos Coelho, dolën të parët në zgjedhjet e muajit të shkuar, por tanimë pa shumicën dërrmuese, për shkak të pakënaqësisë së krijuar te votuesit prej masave të kursimit.
Antonio Costa, udhëheqësi socialist, mendohet se do të jetë së shpejti kryeministri i ri i një koalicioni të gjerë të së majtës. “Tabuja ka marrë fund. Muri është shembur. Mazhoranca e vjetër nuk mund të pretendojë të jetë çka pushoi së qenuri,” do të thoshte entuziast Costa pas votimit në parlament. /tesheshi.com/
