Pozicioni i guvernatorit të Bankës Qendrore në Turqi po rezulton të jetë një “karrige elektrike” me ndryshimet e vazhdueshme të viteve të fundit, ku “viktima” e fundit është Hafize Gage Erkan.
Guvernatorja e Bankës Qendrore ka dhënë dorëheqjen të premten nga detyra, siç ka bërë të ditur sot në një postim në X.
Në postimin e saj të gjatë ajo thotë ndër të tjera se ka ardhur në Turqi për të marrë detyrën, pavarësisht vështirësive dhe faktit se ishte nënë e një fëmije që nuk kishte mbushur ende një vjeç.
“Ditë e natë kam kryer detyrat”, shkruan ajo dhe thotë se “programi ekonomik ka filluar të japë fryte. Treguesit dhe ecuria e inflacionit janë dëshmi e këtij suksesi”, shton Erkan.
Mirëpo, vijon Erkan, “më është organizuar një atentat në karakter…”. “Për të mbrojtur familjen dhe fëmijën tim “i kërkova presidentit [Recep Tayyip Erdogan] të më lironte nga detyrat e mia.”
Ajo në fund i shpreh mirënjohjen presidentit për mundësinë që i dha për t’i shërbyer vendit dhe kombit: “Kjo do të jetë trashëgimia më e madhe që do t’u jap fëmijëve të mi”, shkruan ajo.
Mandati nëntë muaj
45-vjeçarja Erkan mori detyrën në qershor 2023 pas një qëndrimi të gjatë në SHBA në Goldman Sachs dhe First Republic Bank.
Bankierja premtues ishte thirrur nga Shtetet e Bashkuara pas zgjedhjeve presidenciale për të zbatuar politikë të shtrënguar monetare për të frenuar rritjen e inflacionit.
Erkan, gruaja e parë që mban postin e lartë, më në fund kërkoi të lirohej nga detyrat e saj pasi u vu nën kritika prej pretendimeve në mediat opozitare se familja e saj ishte e përfshirë në punët e bankës.
Ajo u akuzua së fundmi nga një pjesë e shtypit për nepotizëm, pasi një punonjëse e bankës u ankua se ishte shkarkuar nga puna me kërkesë të babait të guvernatores.
Kush është Hafize Gage Erkan?
Në SHBA ajo mori pseudonimin “vajza e mrekullueshme nga Turqia”. Ajo u kthye në atdheun e saj me një mision të vështirë, ku lira turke mori një kthesë në rënie pas rizgjedhjes së Erdoganit.
Pavarësisht pseudonimit që i është vënë në SHBA, ku ka kaluar pjesën më të madhe të karrierës së saj profesionale, analizat ndërkombëtare shprehnin shqetësime se sa efektive do të ishte në punën e saj, si dhe një përpjekje për t’iu rikthyer politikave ekonomike më “ortodokse”.
Hafize Gage Erkan barrio filloren dhe të mesmen në Stamboll dhe më pas ajo studioi në Departamentin e Inxhinierisë Industriale të Universitetit të Bosforit nga i cili mori një diplomë bachelor në vitin 2001 ndërsa vazhdoi studimet në Universitetin Princeton nga i cili mori doktoraturën në ekonomi. Ajo ishte, në fakt, studentja e parë që përfundoi doktoraturën dyvjeçare brenda një viti. Siç thuhet në faqen e saj në LinkedIn, Erkan është e diplomuar në Programin e Menaxhimit të Avancuar të Harvardit dhe në Stanford Graduate School of Business Program Executive in Leadership.
Bankierja turke e filloi karrierën e saj profesionale në bankën e investimeve Goldman Sachs ku qëndroi për rreth 10 vjet.
Nga viti 2014 deri në vitin 2021, Erkan vazhdoi karrierën e saj profesionale si anëtare e bordit drejtues të First Republic Bank.
Në vitin 2019, emri i Erkanit ishte në listën e Crain-it të grave më të mira në sektorin bankar dhe financë. Një vit më parë, Erkan ishte në listën e San Francisco Business Times dhe Crain’s New York Business me 40 gra të shquara nën 40 vjeçe.
Erkan ishte gjithashtu e vetmja grua nën 40 vjeçe që mbante një pozicion CEO në 100 bankat më të mëdha amerikane. /tesheshi.com/
