Për shkak të duelit verbal në mes të Donald Trump me Khizr dhe Ghazala Khan, prindërit e ushtarit musliman amerikan të vrarë në Irak, edhe disa republikanë eminentë kanë filluar ta denoncojnë haptazi kandidatin e tyre për president.
Meg Whitman, drejtoreshë ekzekutive e Hewlett Packard, ish-kandidate për guvernatore të Kalifornisë, ka deklaruar për The New York Times se do të fillojë të mbledhë donacione për të përkrahur kandidaten demokrate për president, Hillary Clinton.
Kongresmeni Richard Hana nga New York-u është anëtari i parë aktual i Kongresit amerikan i cili ka përkrahur kandidaten demokrate Clinton, duke deklaruar se e kanë “tërbuar” deklaratat e kandidatit amerikan në lidhje me familjen Khan.
Më parë, edhe donatorët më të mëdhenj të kongresistëve dhe kandidatëve për president nga radha e republikanëve, vëllezërit Charles i David Koch kanë paralajmëruar se do t’i anulojnë 300 milion dollarët e dedikuara për fushatën e Trump-it për të mbështetur kandidatët republikan për Kongres gjatë kësaj vjeshte.
Këto reagime të figurave të njohura nga partia republikane, vijnë pasi javën e kaluar nëna e ushtarit të vrarë amerikan me prejardhje muslimane, kishte kritikuar në mënyrë të ashpër Trump-in i cili kishte ofenduar atë dhe bashkëshortin e saj.
Për shkak se kishte qëndruar pranë bashkëshortit të saj gjatë fjalimit prekës me rastin e Konventës Nacionale të Demokratëve pa thënë as një fjalë, Trump tha se ndoshta zonja Khan nuk ishte lejuar të flasë, duke aluduar në faktin se është muslimane.
Ghazali Khan ka pranuar sa shumë ishte ndjerë e fyer nga kjo vërejtje e Trump-it.
Humayun Khan është vrarë gjatë një sulmi me bombë në vitin 2004, në Irak në moshën 27-vjeçare. /tesheshi.com/
