Disa orë përpara se të mbajë një fjalim mbi emigracionin në Feniks të Arizonës, ku do t’i shpjegojë hollësisht masat kundër emigracionit ilegal, kandidati republikan në zgjedhjet presidenciale amerikane do të vizitojë Meksikën.
Donald Trump do të takohet me presidentin meksikan, Enrique Pena Nieto, i ftuar nga ky i fundit.
“E kam pranuar ftesën e presidentit Enrique Pena Nieto të Meksikës dhe shpresoj shumë të takohem me të nesër,” pohoi Trump në një postim në rrjetet sociale.
Trump është i njohur për deklaratat e tij gjatë fushatës elektorale se do të ndërtojë një mur mes dy vendeve, duke përdorur një gjuhë të ashpër kundër emigrantëve meksikanë.
Presidenti meksikan ka njoftuar se do të ketë një takim privat, e se do të diskutohen marrëdhëniet dypalëshe. Ai gjithashtu është i njohur për reagimin e fortë ndaj deklaratave të Trump-it, duke e krahasuar atë më herët me figura famëkeqe të historisë botërore.
“Besoj në dialogun për t’i mbrojtur interesat meksikane në botë, për t’i mbrojtur meksikanët kudo ku janë,” ka shtuar Pena Nieto.
Kreu i shtetit meksikan e ka ftuar dhe kandidaten demokrate, Hillary Clinton, por shtabi i saj i fushatës nuk ka bërë të ditur nëse ajo do ta vizitojë Meksikën. /tesheshi.com/
