Ambasadori amerikan, Donald Lu ka sulmuar një politikan të lartë, që edhe pse nuk ia përmend emrin bën pjesë tek ata që kundërshtojnë reformën në drejtësi. Lu i ka quajtur arrogantë.
“Ka ardhur koha që politikanët të fillojnë ta dëgjojnë popullin e tyre”, tha ambasadori amerikan Donald Lu.
“Kam pasur një diskutim me një politikan që pretendonte se populli shqiptar nuk mund ta kuptojë në të vërtetë debatin për reformën në drejtësi. Sinqerisht, kjo është tipike për arrogancën e politikanëve dhe elitës shqiptare që besojnë se vetëm ata janë të zgjuar mjaftueshëm për të kuptuar se cfarë po ndodh në shoqërinë shqiptare”, deklaroi Lu, duke thënë se korrupsioni i ka ndarë qytetarët shqiptarë nga politika dhe gjyqësori.
“Nga e di unë se shqiptarët e kuptojnë reformën dhe problemin e korrupsionit? Për shkak të studimeve serioze të Shoqërisë Civile. Për shumë vite qeveria e SHBA-së, përmes USAID dhe tani për programit të Misionit për Demokraci, ka mbështetur këtë indeks për konstatimin e korrupsionit. Ai është kryer në mënyrë profesionale.
Raporti tregon pak përparim gjatë 12 muajve të fundit me një rënie prej 13% të njerëzve që thonë se kanë pasur një përvojë vetjake dhe të drejtëpërdrejtë me korrupsionin. Studimi vazhdon të tregojë se problemet më të mëdha të korrupsionit mbeten tek udhëheqësit e partive politike, prokurorët, gjykatësit dhe doganierët. Nuk habitem aspak nga ky përfundim. Ai tregon se populli shqiptar e kupton me të vërtetë se cfarë po ndodh me korrupsionin në Shqipëri. Ka ardhur koha që politikanët të fillojnë ta dëgjojnë”, tha Lu, në një aktivitet të një organizate ku u dhanë rezultatet e luftës ndaj korrupsionit. /tesheshi.com/
