Ambasadori i Shteteve të Bashkuara të Amerikës, Donald Lu, deklaroi sot në një konference për shtyp në Facebook se FBI po ndihmon për ngritjen e një strukture e cila do të ketë kapacitet që të arrestojë zyrtarët e lartë të përfshirë në korrupsion.
Duke iu përgjigjur pyetjeve për çështjet “Doshi” dhe “Marku”, ambasadori vlerësoi veprimet e Parlamentit dhe të Prokurorisë. “Eshtë me rëndësi që të vazhdohet procesi i dekriminalizimit. Ne nxisim partitë politike të largojnë individët me veprimtari kriminale”, shkruan ambasadori. Sipas tij, Prokuroria dhe Gjykata duhet të përmbushin përgjegjësitë e tyre.
Disa pyetje ishin pikërisht për ndihmën konkrete që autoritetet amerikane do t’i japin Byrosë Kombëtare të Hetimit në Shqipëri.
Në fillim, ambasadori Lu ka shpjeguar arsyet pse është e rëndësishme që Shqipëria të themelojë një Zyre Kombëtare Hetimi. “Së pari, duhet të ekzistojë një institucion për zbatimin e ligjit me kapacitet të zhvilluar hetimi. Së dyti, ka gjithashtu nevojë për një institucion që ka autoritetin për të hetuar zyrtarë deri në nivelet më të larta. Skuadra jonë nga FBI ishte këtu për të biseduar se si ne mund të ndihmojme në ngritjen e një Zyre Kombëtare Hetimi në Shqipëri, në përpjekjet e saj për të luftuar korrupsionin, krimin e organizuar dhe trafikun e drogës. Zyra e Prokurorisë së Përgjithshme dhe institucionet e drejtësisë duhet të vazhdojne të përmbushin përgjegjësitë e tyre për të zbatuar ligjin dhe siguruar një proces të rregullt”, ishte përgjigjja e ambasadorit amerikan në Tiranë.(tesheshi.com)
