Danimarka duket e vendosur të shkojë pëprara me planet e saj që në ligjin e ri të azilit të përfshihet një pikë sipas së cilës refugjatët do të detyrohen të dorëzojnë sendet me vlerë që zotërojnë, në mënyrë që të paguajnë për strehimin e tyre ndërkohë që aplikojnë për azil. Kjo lëvizje ka nxitur reagimin e Kombeve të Bashkuara që thonë se ligji i ri mund të nxisë frikën dhe ksenofobinë.
Qeveria daneze ka siguruar tashmë shumicën parlamentare në favor të legjislacionit të ri që pritet të miratojë e që redukton ndjeshëm të drejtat e refugjatëve.
Legjislacioni sanksionin që azilkërkuesit që mbërrijnë me më shumë se 10 mijë kroner kesh në vend “duhet ta përdorin tepricën mbi këtë shumë për të paguar qëndrimin e tyre në vend”, të paktën kështu deklaroi zëdhënësi i qeverisë daneze për gazetën britanike “The Guardian”.
Pas kritikave që tërhoqi drafti i mëparshëm i ligjit të azilit, refugjatët nuk do të detyrohen më të dorëzojnë sendet me vlerë sentimentale, të tilla si unazat e martesës, apo gjërat që konsiderohen si esenciale si orët e dorës. Medaljonët e artë sërish mund të konsiderohen sende luksi dhe të merren nga refugjatët, por zëdhënsi Knuth tha se në rast të një konflikti nëse bëhet fjalë për sende me vlerë sentimentale ose jo, fjala e fundit do t’I takojë azilkërkuesit.
Në përgjigje të komenteve që krahasojnë ligjin e ri me trajtimin e hebrenjve gjatë Holokaustit, Knuth tha se pretendimi është “qesharak” pasi rregulla të tilla aplikohen edhe ndaj danezëve kur ata aplikojnë për ndihmë sociale. “Ne thjesht jemi duke aplikuar të njëjtat rregulla si ndaj qytetarëve danezë që dëshirojnë të marrin para nga qeveria daneze”, tha ai.
Kjo lëvizje është përpjekja më e fundit e qeverisë daneze të qendrës së djathtë për të reduktuar detyrimet e saj nga refugjatëve. Muajin e kaluar, kryeministri Lars Lokke Rasmussen për t’i dhëë fund konventës së OKB-së së vitit 1951 për refugjatët, një ligj i hartuar pas holokaustit – ky sugjerim u cilësua nga OKB si zmbrapsje me mijëvjeçarë në progresin e njerëzimit.
Mbështetësit lokalë të refugjatëve gjithashtu paralajmërojnë se ka disa aspekte të tjera përkeqësuese në ligjin e ri të azilit më të rënda sesa ato që kërkojnë dorëzimin e sendeve me vlerë nga refugjatët. Nëse ligji miratohet, ai do të ndalojnë pjesën më të madhe të refugjatëve sirianë nga e drejta për të marrë më shumë se një vit garanci për strehimin e tyre, në rast se nuk provojnë se qëndrimi në Siri përbën rrezik për ta. Prindërit që mbërrijnë në vend pa fëmijët e tyre do të duhet të presin të paktën tre vjet derisa të mund të aplikojnë për t’u bashkuar me familjen, një klauzolë që grupet e të drejtave të refugjatëve e cilësojnë veçanërisht mizore.
Michala Clante Bendixen, kryetare e “Mikpritjes së Refugjatëve” në Danimarkë thotë: “Kjo pikë do të thotë se pjesa më e madhe e familjeve do të qëndrojnë të ndara deri në pesë vjet. Së pari, ata do të duhet të presin që të procedohet kërkesa e tyre për dhënien e azilit, më pas edhe tre vjet pritje për të aplikuar për bashkim me familjet. Ndarja e familjeve për pesë vjet është çmenduri”, thotë ajo.
Ndërsa Danimarka pranoi vetëm 20 mijë azilkërkues në vitin 2015 – 2 për qind e numrit total që mbërriti në Europë vitin e kaluar – qeveria e saj është në kërkim të shkurajimit të të tjerëve për të mbërritur në vend. “Ata kanë dy qëllime, thotë Bendixen, një që të frikësojnë njerëzit për të mos ardhur në Danimarkë dhe tjetri të vështirësojnë sa më shumë jetën e atyre që tashmë janë këtu dhe t’i detyrojnë të largohen”.
Danimarka gjithashtu së fundmi po zbaton kontrolle më të rrepta kufitare, duke detyruar të kthehen pas në Gjermani shumë azilkërkues. Gjermania që priti 1.1 milionë refugjatë vitin e kaluar gjithashtu ka nisur të kthejë pas njerëzit nga kufijtë e saj jugorë, pasi numri i atyre që deportohen në Austri në janar shkoi në 200 persona në ditë, nga 60 persona në ditë që kthente në dhjetor.
Përgatiti: Juli Prifti – /tesheshi.com/
