Ngjan si mallkim për Ramën prirja e tij për të vënë rregull urban me ndëshkimin e çdo ndërtimi pa leje. Kjo pasi siç me Bojken Lakon, i dënuar për një dritare, tashmë radhën e ka Mimoza Ahmeti, poetja e njohur, e cila jo për një dritare por për një banesë, është dënuar me 45 ditë punën në komunitet.
Ajo po ndërtonte banesën e saj të prishur nga tërmetit, në Petrelë, por që siç thuhet në dokumentin e Prokurorisë, e bënte këtë pa leje ndërtimi.
Dhe ky zhvillim ligjzbatues ndaj një ligjshkeljeje ka qenë tërësisht nën frymën e Ramës, me të cilën nisi dhe qeverisjen e tij në 2013-ës, duke i mëshuar fort mbylljes së një cikli disavjeçar abuzimesh në territor, ku çdokush ndërtonte si të donte dhe ku të donte, duke sjellë kësisoj një masakër urbane, e dallueshme me sy të lirë.
Por tashmë, viktimë e kësaj fryme po bien dhe emra VIP, për të cilët Rama shtrëngohet të reagojë ndaj drejtësisë, me pretendimin se kjo e fundit tregon selektivitet.
Por dhe ky ngjan me një mallkim, pasi Rama e mban ndër krenaritë e tij Reformën në Drejtësi, e cila në perceptimin e përgjithshëm nuk ka sjellë ende drejtësi deri më tani.
“Pas një këngëtari ja edhe një poete, që dënohet me zell nga pikërisht Prokuroria e Tiranës, ku dosjet e denoncimeve nga organet shtetërore për ndërtime të paligjshme për qëllim fitimi apo për evazion fiskal me miliona USD dhe për pastrim të miliona USD, flenë të patrazuara!
Patjetër që çdo ndërtim pa leje është i dënueshëm me ligj, po zelli milimetrik në dënimin e atyre që e shkelin ligjin në pronën e tyre të bën për të vjellë përballë mosveprimit sistematik të Prokurorisë së Tiranës ndaj atyre që për qëllime fitimi bëjnë shkelje kilometrike”, shkruan Rama, referuar asaj që kohët e fundit denoncoi ndërtime shumëkatëshe pa leje në Tiranë, duke ia faturuar përgjegjësinë drejtësisë më së shumti.
Koinçidenca
Ndërkohë ka një koiçidencë në dy rastet, të Lakos e Ahmetit, në raport me Ramën.
Boku, siç e thërrasin ndryshe Bojken Lakon, është i biri i të ndjerit Bujar Lako, një mik me Ramën në vitet ’90 por dhe më përpara, ama jo politikisht. Në zgjedhjet lokale të 2003-shit, Lako do kandidonte për kreun një njësie bashkiake nën siglën e PD-së.
Ndërsa Mimoza Ahmeti, ish-bashkëshorte e Aurel Plasarit, mikut tjetër gë Ramës, gjithashtu jo politikisht, kandidoi për deputete nën siglën e PD-së në zgjedhjet e 2001-shit. /tesheshi.com/
