Të rinjtë duhet të ndalohen nga blerja e produkteve të duhanit deri në moshën 22 vjeçare, kanë sugjeruar shkencëtarët pasi hulumtimi zbuloi se ata që e fillojnë duhanin para moshës 20 vjeç e kanë më të vështirë ta lënë duhanin. Shkencëtarët besojnë se një rritje ligjore në moshën minimale në mbarë botën mund të zvogëlojë varësinë nga nikotina.
Ekipi nga Japonia shqyrtoi 1,382 duhanpirës që vizituan një klinikë për ndërprerjen e duhanit në Kioto. Pacientët u ndanë në dy grupe në bazë të moshës në të cilën ata filluan të pinë duhan – më të rinj nën 20 vjeç ose 20 vjeç e lart. Të gjithë përfunduan Testin Fagerstrom për Varësinë nga Nikotina (FTND), një mjet standard për vlerësimin e intensitetit të varësisë fizike të një personi nga nikotina.
Çfarë tregoi studimi?
Testi parashtronte pyetje si “sa shpejt pas zgjimit pini cigaren tuaj të parë?” dhe “Sa cigare pini në ditë?”, dhe pacientët dhanë përgjigje që u shënuan. Më pas, numrat mblidhen për të dhënë një varësi të ulët (një-dy), të ulët në mesatare (tre-katër), të moderuar (pesë-shtatë) ose të lartë (tetë ose më shumë).
Monoksidi i karbonit është matur edhe në frymëmarrje për të treguar se sa cigare janë pirë në 24 orët e fundit. Gjithsej 556 duhanpirës kanë filluar të pinë duhan para moshës 21 vjeçare, që është mosha ligjore në Japoni, ndërsa 826 prej tyre e kanë filluar kur kanë mbushur 20 vjeç.
Ata që e filluan zakonin para moshës 21-vjeçare raportuan se pinin 25 cigare në ditë krahasuar me 22 në ditë në grupin që filloi të pinte duhan më vonë. Ata që filluan më herët kishin gjithashtu nivele më të larta të monoksidit të karbonit në frymëmarrje.
Nga ata që e filluan duhanin herët, 46 për qind e lanë me sukses, krahasuar me 56 për qind të atyre që filluan pirjen e duhanit kur ishin mbi 20 vjeç. Gjetjet u prezantuan në Kongresin e Shoqatës Evropiane të Kardiologjisë (ESC) 2023 në Amsterdam.
“Rezultatet tona tregojnë se fillimi i hershëm i pirjes së duhanit shoqërohet me varësi më të madhe nga nikotina, madje edhe në moshën e rritur”, tha autori Dr. Koji Hasegawa i Organizatës Kombëtare të Spitalit të Qendrës Mjekësore të Kiotos.
“Studimi tregon se rritja e moshës ligjore për të blerë duhan në 22 ose më lart mund të çojë në një reduktim të numrit të njerëzve të varur nga nikotina dhe në rrezik të pasojave të dëmshme shëndetësore”, shtoi ai. Në shumicën e vendeve të botës duhet të jeni mbi 18 vjeç për të blerë cigare dhe në disa shtete të SHBA-së duhet të jeni të paktën 21 vjeç. /tesheshi.com/
