Rusia është në zi sot për viktimat e avionit rus TU-154 të rrëzuar një ditë më parë në ujërat e Detit të Zi pak pas ngritjes nga toka.
Avioni kishte 92 persona në të, 84 prej të cilëve ishin pasagjerë. Aksidenti ndodhi pas rimbushjes me lëndë djegës në një aeroport afër Soçit, ndërsa po fluturohej drejt një baze ushtarake pranë Latakias, në Siri. Pjesa më e madhe e pasagjerëve i përkisnin Ansamblit Aleksandrov, korit të ushtrisë.
Ministri rus i Transportit, Maksim Sokolov, e ka përjashtuar mundësinë që rrëzimi të ketë ardhur si pasojë e një akti terrorist.
Një problem teknik ose një gabim në pilotim mund të ketë qenë, sipas tij, shkaku i aksidentit tragjik.
“Teoritë kryesore nuk e përfshijnë terrorizmin, prandaj ne mendojmë se problemet teknike apo një gabim në pilotim mund të ketë qenë shkaku,” raporton Russia Today të ketë thënë zyrtari rus.
Agjencia e lajmeve TASS i referohet një burimi të sigurisë kur thotë se avioni do të rifurnizohej në Mozdok, por koha e keqe e detyroi avionin të ulej në aeroportin e Adlerit.
“Askush nuk e dinte më parë se avioni do të rifurnizohej në aeroportin në Soçi,” i ka deklaruar burimi TASS-it.
Aktiviteti fluturues i këtij lloj avioni është i mbushur me një seri aksidentesh tragjike. /tesheshi.com/
