Shtetet e Bashkuara dhe përfaqësuesit e Talibanëve afganë kanë nënshkruar një traktat paqeje në kryeqytetin e Katarit Doha, i cili duhet të përfundojë luftën më të gjatë të SHBA-së që prej gati dy vitesh bisedimesh.
Marrëveshja u nënshkrua nga Përfaqësuesi Special i SHBA-së, Zalmay Khalilzad dhe shefi politik i Talibanëve, Mullah Abdul Ghani Baradar.
Para nënshkrimit të traktatit, një deklaratë e përbashkët u lëshua nga qeveritë amerikane dhe afgane ku thuhej se nëse Talibanët përmbushin angazhimet e tyre, SHBA dhe Aleanca e Atlantikut të Veriut (NATO) do të tërheqin të gjitha trupat e tyre nga Afganistani brenda 14 muajve të ardhshëm.
U tha gjithashtu se në 135 ditët e ardhshme Uashingtoni do të zvogëlonte numrin e trupave amerikane në Afganistan në 8,600. Shtetet e Bashkuara janë zotuar të financojnë trajnimin, këshillimin dhe pajisjen e forcave afgane të sigurisë dhe të mos përdorin forcë kundër integritetit territorial të Afganistanit ose të ndërhyjnë në punët e saj të brendshme.
Qeveria afgane është zotuar të kërkojë nga Këshilli i Sigurimit i KB që të largojë të gjithë anëtarët e lëvizjes Talibane nga lista e sanksioneve deri më 29 maj.
Sekretari i Përgjithshëm i NATO-s, Jens Stoltenberg tha që Aleanca mbështet këtë marrëveshje paqeje dhe shtoi se “ne jemi të gatshëm të rregullojmë dhe zvogëlojmë praninë e NATO-s pas nënshkrimit të marrëveshjes.”
“Rruga për paqe është e gjatë dhe e vështirë dhe ne duhet të jemi të përgatitur për problemet,” tha ai, duke shtuar se NATO do të rrisë praninë e saj në Afganistan nëse situata në terren përkeqësohet.
Ky zhvillim, që amerikanët e cilësuan dhe si “Ditë monumentale për Afganistanin”, me gjasë mund të komentohet dhe si kapitullim amerikan në këtë vend. 18 vjet ka zgjatur përplasja mes talebanëve dhe amerikanëve, që kur këta të fundit vendosën të pushtojnë Afganistanin që udhëhiqej nga talebanët, fill pas sulmeve të 11 Shtatorit. Por që atëherë, nuk mundën dot ta bëjnë zap këtë vend, duke e çuar drejt një toke të djegur nga përplasja e vazhdueshme, me pasoja dhjetra mijra viktima. /tesheshi.com/
