Ashtu si shumë festa të tjera, siç janë ato të 28 -29 nëntorit, edhe dita e rinisë është kujtuar e ndarë dhe në mënyra të kundërta, nga mazhoanca dhe opozita. 8 dhjetori është cilësuar si dita e rinisë, pasi 26 viteve më parë, Lëvizja Studentore u ngrit kundër regjimit të vjetër diktatorial.
Paraditja e sotme është shoqëruar me protesta të shpërndara në disa pika të ndryshme nga ana e opozitës. Turmën e dominojnë kryesisht të rinjtë e FRPD-së, të cilët janë mbledhur përpara ministrisë së Shëndetësisë, para godinës së ministrisë së Arsimit, të tjerë tek ajo e Brendshme, dhe një pjesë tjetër përballë bashkisë, për të vijuar më pas drejt kryeministrisë.
Me pankarta në duar ata kanë rikujtuar dhe ringritur edhe një herë disa çeshtje, për të cilat është protestuar edhe më parë. Kështu, para bashkisë të rinjtë kërkuan sërish drejtësi për vdekjen e 17-vjeçarit Ardit Gjoklaj, i cili u gjet i vdekur në Landfillin e Sharrës. Para Ministrisë së Arsimit, të rinjtë protestojnë kundër reformës në arsimin e lartë. Tek ministria e Shëndetësisë kundër korrupsionit dhe kontratave koncesionare të firmosura nga ministri Ilir Beqaj, ndërsa para ministrisë së Brendshme për çeshtjen e kanabisit në Shqipëri.
Nndërkohë, kryeministri Rama e ka parë në një tjetër këndvështrim këtë ditë, teksa mori pjesë në çeljen e Zyrës Rajonale për Bashkëpunimin Rinor në Tiranë.
“Sot jemi në një kontekst tjetër. Kemi një atmosferë paqeje dhe ndërveprimi, pavarësisht se nuk jemi dakord me gjithçka mes njëri-tjetrit. Prandaj iniciativa të tilla janë kaq të vyera, sepse janë përpjekjet e duhura në rrugën e duhur, për t’i dhënë kësaj paqeje cilësinë e një bashkëpunimi të qëndrueshëm, e një ndërveprimi të harmonizuar në funksion të një rruge që për ne është qartësisht e përcaktuar, që është rruga e Bashkimit Europian”, tha Rama./tesheshi.com/
