Përvjetori i 69-të i Nakba-së, “Ditës së katastrofës”, është përkujtuar nga palestinezët me manifestime në rrugët e Bregut Perëndimor e të Rripit të Gazës.
Mijëra njerëz manifestuan në Ramallah dhe në Betlehem me flamujt palestinezë në duar. Manifestimet u pasuan nga përplasje me forcat izraelite të sigurisë, ku pati dhe të lënduar mes protestuesve.
Dita e 15 majit quhet ndryshe dhe Dita e Nakba-së, e katastrofës, për shkak të zhvendosjes së detyruar të 750.000 palestinezëve në 1948-n me shpalljen shtet të Izraelit, të nxjerrjes së tyre nga shtëpitë e të mbylljes në kampe refugjatësh.
Veç kësaj, mbi 500 fshatra dhe qyteza palestineze u rrafshuan asokohe për të garantuar moskthimin e
palestinezëve në shtëpitë e tyre.
Të kthyer në refugjatë, këta palestinezë kanë qëndruar që atëherë jashtë Palestinës, në kampe refugjatësh, pa u lejuar të kthehen.
Çelësat në duart e manifestuesve dje në përkujtim të Nakba-së simbolizonin pikërisht kërkesën e vazhdueshme për kthimin e të dëbuarve në shtëpitë e tyre.
Përkujtimi i Nakba-së ka përkuar dhe me ditën e 29-të të grevës së urisë të 1.500 të burgosurve palestinezë në burgjet izraelite. /tesheshi.com/
