Kryeministri i Kosovës Ramush Haradinaj, ka shfrytëzuar Ditën e Europës që t’i kujtojë BE-së se po vijon të sillet padrejtësisht ndaj Kosovës duke mos ja liberalizuar vizat.
Më anë të një statusi në FB, Haradinaj thekson më së pari identitetin europian, sipas tij, të Kosovës.
“Kosova shënon Ditën e Europës sot, sepse jemi pjesë gjeografike, ideologjike, dhe identitare e familjes europiane, ndër shekuj. Qytetarët dhe institucionet e Kosovës sot kanë aspiratë të vetme integrimin e plotë në Bashkimin Europian, për të kontribuar në prosperitetin, paqen, sigurinë, dhe drejtësinë e kontinentit tonë. Më shumë Europë në Ballkan do të thotë më shumë mundësi, rritje, shkëmbim e zhvillim.
Në shënimin e Ditës së Europës këtë vit, Kosova zotohet fuqishëm për të vazhduar përkushtimin e pandalshëm për integrim në BE dhe për mbrojtje të vlerave demokratike të cilat na bashkojnë”, shkruan Haradinaj, që më pas çon “gjuhën atje ku dhemb dhëmbi”
“Po sot, i bëjmë thirrje shteteve anëtare të Bashkimit Europian dhe institucioneve të BE-së, që të njohin dhe pranojnë të arriturat e Kosovës, dhe të mos vazhdojnë të mbajnë qytetarët e Kosovës edhe më tutje padrejtësisht të izoluar nga familja që i takojnë.
Urime Europë – Kosova është e jotja!”, përfundon mesazhi i Haradinaj. /tesheshi.com/
