Sot në mbarë botën festohet Dita Botërore e të Drejtave të Konsumatorit. Kjo ditë festohet për katër dekada dhe çdo vit veçohet një çështje që është veçanërisht e rëndësishme për konsumatorët.
Edhe këtë vit, 15 marsi i kushtohet rëndësisë së mbrojtjes së të drejtave të konsumatorëve dhe ndërgjegjësimit për të drejtat e tyre. Të drejtat e konsumatorit sigurojnë sigurinë dhe mbrojtjen e klientëve kur blejnë produkte dhe shërbime.
Konsumatorët kanë të drejtën për sigurinë e produktit, informacionin e produktit, mbrojtjen nga tregtia e padrejtë, si dhe të drejtën e mbrojtjes ligjore në rast të shkeljes së këtyre të drejtave. Përveç kësaj, konsumatorët kanë të drejtë për produkte të shëndetshme dhe të sigurta që prodhohen në mënyrë të qëndrueshme.
Çdo vit, Consumers International thekson një çështje urgjente me të cilën përballen konsumatorët në mbarë botën. Këtë vit, anëtarësimi i Consumers International – 200 grupe të konsumatorëve në 100 vende – ka zgjedhur “Fair Digital Finance” si temë globale.
Deri në vitin 2024, numri i përdoruesve të bankave dixhitale pritet të kalojë 3.6 miliardë. Në vendet në zhvillim, pjesa e mbajtësve të llogarive që dërgojnë dhe marrin pagesa dixhitale u rrit nga 57% në 2014 në 70% në 2017.
Shërbimet financiare dixhitale mund të fuqizojnë konsumatorët, por ato duhet të jenë të aksesueshme për të gjithë dhe të ofrojnë siguri dhe mbrojtje të të dhënave. Për të arritur këtë qëllim, është e nevojshme krijimi i një tregu financiar dixhital që do të jetë gjithëpërfshirës, i sigurt dhe i qëndrueshëm për të gjithë.
Si konsumatorë, ne kemi të drejtë të aksesojmë financa dixhitale të drejta dhe të sigurta.
Kjo përfshin mbrojtjen nga mashtrimi, sigurimin e transparencës në lidhje me tarifat dhe kostot, ofrimin e informacionit cilësor për produktet dhe shërbimet dhe sigurimin e aksesit në shërbimet financiare për të gjithë përdoruesit.
Dita Botërore e të Drejtave të Konsumatorit festohet zyrtarisht që nga viti 1983, por rrënjët e saj datojnë që në vitin 1962, kur presidenti amerikan John F. Kennedy mbajti një fjalim para Kongresit në të cilin mbështeti të drejtat e konsumatorëve.
Kjo ditë është një mundësi për të rritur ndërgjegjësimin për rëndësinë e mbrojtjes së të drejtave të konsumatorëve dhe për të vënë në dukje problemet me të cilat ne të gjithë si konsumator përballemi çdo ditë. /tesheshi.com/
