Disko dhe mikpritje. Në një vështrim të parë nuk është se kanë shumë të përbashkëta: nga njëra anë bëhet fjalë për një mënyrë argëtimi gjatë natës dhe nga ana tjetër për persona në vështirësi dhe që nuk kanë thuajse asnjë gjë.
Në fakt, në Berlin të Gjermanisë rreth 80 klube nate kanë vendosur të bashkojnë këto dy terma dhe t’i japin një dorë ndihmë konkrete migrantëve, duke u kërkuar të gjithë të ftuarve në evente, koncerte apo festa, që të dhurojnë të paktën një euro. Bëhet fjalë për një shifër minimaliste, e cila nuk ndikon shumë në xhpat e dhuruesve, por që nëse shumëfishohet është tepër e rëndësishme për të gjithë personat në nevojë.
Fushata quhet Plus1 dhe që nga emri mund të kuptoni gjithçka. Ka nisur tetorin e shkuar dhe deri më sot ka arritur të mbledhë plotë 50 mijë euro. mënyra e funksionimit është e thjeshtë. Në hyrje të lokaleve ndodhen kuti në të cilat shkruhet “Plus1 refugees welcome”. Sapo nis mbrëmja, të cilësuarit si persona vip, por edhe të tjerët, japin të paktën 1 euro dhe më shumë për refugjatët.
Me kalimin e kohës klubet që kanë përqafuar këtë iniciativë janë rritur. Një pjesë e madhe e mbledhjes së të ardhurave i kushtohet edhe punës me rrjetet sociale, por veçanërisht bandave muzikore si Massive Attack, të cilët kanë përdorur imazhin e tyre për të promovuar këtë iniciativë. /tesheshi.com/
