Diplomati amerikan, ish-ambasadori i SHBA-së në disa shtete të rajonit, Christopher Hill nuk është shprehur kundër ndryshimit të kufijve mes Kosovës dhe Serbisë, por ka kërkuar që kjo çështje të trajtohet me kujdes pasi mund të prodhojë pasoja afatgjate.
Ambasadori Hill i cili po qëndron në Tiranë për Samitin e paqes të Evropës Juglindore, foli edhe për sigurinë në Ballkan, ndikimin rus dhe pretendimet për themelimin e një “minishengeni” Ballkanik.
“Nuk jam kundër ndryshimit të kufijve, por duhet të bëhet me kujdes. Rregullimet e kufijve janë një lëndë shumë e rëndësishme dhe me goxha peshë. Nuk mund të bëhen pa një njohuri shumë të madhe dhe të mirë sa i përket këtyre kufijve dhe për të parë si ndihen njerëzit për këtë. Këto janë tema që nuk lidhen me rishikimin ose hartimin e një buxheti vjetor, por për një të ardhme shumë më afatgjate… Duhet të jenë jashtëzakonisht të kujdesshëm për këto gjëra. Mund të duken se gjëja e duhur, por asnjëherë unë nuk do të nxitohesha për gjëra të tilla. Një gjë tjetër është që ka dallime midis vendeve që njerëzit besojnë që do të zgjidhen me shkëmbim kufijsh. Këto dallime shkojnë më thellë se kaq…nuk jam kundër, e kuptoj pse po diskutohet, por duhet të bëhet me më shumë kujdes”, tha ai.
Tema e ndryshimit të kufijve nuk është mohuar as nga i dërguari special i Trump, Richard Grenell, ndonëse ende nuk ka shprehur qëndrime të detajuara për këtë çështje.
Ajo që dihet tashmë është se të dy palët, si Prishtina ashtu dhe Beogradi, do të përpiqen që të dalin sa më të kënaqur nga përfundimi i negociatave të stërzgjatura.
Ditë më parë, presidenti serb Aleksandar Vuçiç ka thënë se do të ishte i kënaqur që të merret “sa më shumë që është e mundur” nga territori që ndërkombëtarisht i njihet Kosovës. Në anën tjetër, qeveria e re që pritet të formohet së shpejti në Kosovë, ka qëndrime kategorikisht të kundërta me kërkesën e Beogradit, duke u shprehur në mënyrë eksplicite kundër gjymtimit të territorit, ashtu si kundër shkëmbimit të tij. /tesheshi.com/
