Ende mbetet enigmë identiteti i plotë i dy diplomatëve rusë që u larguan nga Tirana zyrtare një ditë më parë. Një burim në Ministrinë e Jashtme bën të ditur se të dëbuarit janë Aleksey Bashashov dhe Vlasislav Filipov.
Balashov është Sekretari i Parë i Ambasadës me mbulim shërbimin sekret rus FSB. Ndërkaq, Vladislav Filipov, me gradë kolonel është atashe ushtarak dhe mendohet se është resident i GRU-së, i cili është shërbimi ushtarak i Moskës.
Por gjithsesi listën diplomatike të ambasadës ruse në Tiranë figurojnë edhe dy emra të tjerë në këto poste. Sekretar i Parë përveç Bashashovit janë edhe Aleksandër Kovalenko e Dimitry Krasakov. Ndërkohë atashe ushtarakë janë edhe kapiteni Sergey Kuklev dhe kapiteni Vladimir Kurochkin.
Ministri i Jashtëm Ditmir Bushati, në intervistën që dha për TCH nuk përmendi as emrat e as funksionet e diplomatëve të larguar.
Sipas deklaratës së MEPJ, “veprimtaria e dy diplomatëve nuk përputhej me statusin e tyre diplomatik”, ndërkohë që nuk jepen më shumë të dhëna.
Kryeministri Edi Rama mësohet të jetë shprehur në mbledhjen e grupit parlamentar se dëbimi i diplomatëve është vendosur në koordinim me Bashkimin Europian, NATO-n dhe Britaninë e Madhe pas helmimit të ish-agjentit rus, Sergei Skripal.
Ndërkaq, Zv.Ambasadori i Rusisë në Tiranë, Dmitry Kazmin ka reaguar në mënyrë “babaxhane” duke thënë se do të jetë koha ajo që do të vërtetojë se veprimi i palës shqiptare ka qenë i gabuar. Kazmin tha se Rusia nuk e përjashton mundësinë e një kundërpërgjigjeje.
“Lidhur me vendimin e autoriteteve shqiptare për largimin e dy diplomatëve rusë, na duhet të shprehim keqardhjen për këtë rast. Ky vendim bie ndesh me përpjekjet tona për përmirësimin dhe intesifikimin e marrëdhënieve dypalëshe. Vendimi është i pabazuar dhe koha do ta tregojë këtë.
Në këtë situatë nuk mund të përjashtohen edhe kundërmasat nga pala ruse. Edhe njëherë tjetër dua të shpreh keqardhjen për ç’ka ndodhi. Veprimi i palës shqiptare i kundervihet frymës pozitive për marrëdhënie të mira midis dy vendeve.
Përgjigjen zyrtare ju do ta merrni në të ardhmen e afërt”.
Vendimi për largimin e diplomatëve erdhi pas një takimi mes ambasadorit të SHBA-së në Tiranë, Donald Lu dhe kryeministrit shqiptar, Edi Rama.
Kërkesa Tiranës zyrtare erdhi nga Uashingtoni si një reagim i përbashkët i vendeve anëtare të NATO-s. /tesheshi.com/
