Dinastia e Realit, dominimi i madrilenëve (foto)

“Juventusi qe supozuar të ishte gati më në fund për sfidën. Në vend të kësaj, ata u kthyen në shtëpi kokulur,” shkruan një penë e Eurosport-it pas finales së Champions League-s së fituar nga Reali i Madridit.

“Një dinasti e vërtetë ka marrë trajtë. Çështja është tani se kush mund t’i ndalojë ata (madrilenët) së stolisuri atë,” vijon komenti në fjalë.

“Ishte një natë madhështie. Madhështi për golat e Ronaldo-s, ndërsa ai shënoi dy gola të tjerë në finalen e Champions League-s, për të fituar trofeun e tij të katërt, madhështi për Zidane-n, që fitoi Champions League-n e tij të dytë në vetëm ndeshjen e 20-të europiane të karrierës së tij të shkurtër si trajner, e madhështi në humbje, ndërsa Mario Mandzukic kontribuoi me një gol spektakolar…”

“Eshtë një ndjenjë e jashtëzakonshme gëzimi për lojtarët dhe klubin,” deklaroi Zinedine Zidane në konferencën e shtypit pas fitores 4-1 që i dha Realit trofeun e 12-të në Champions League.

“Ne jemi të lumtur sepse nuk është e lehtë të arrish gjëra të tilla si fitorja e kampionatit dhe e Champions League-s. Ka qenë një vit spektakolar,” ka shtuar francezi.

“Nuk jam i befasuar nga niveli i Realit të Madridit,” është shprehur po në konferencën e shtypit të pas finales Massimiliano Allegri, tekniku i Juventusit.

“Luajtëm shkëlqyeshëm në pjesën e parë, por në pjesën e dytë u gjetëm nën presion dhe nuk patëm zgjidhje. Do të luftojmë përsëri për titullin. Do të vazhdojmë të punojmë për t’iu afruar Realit të Madridit. Ata kanë fituar dy finale rresht, dhe ne nuk jemi ende në atë stad.”

“Reali ka bërë historinë. Madrilenët mund ta quajnë tashmë veten mbretër të Europës,” thuhet në dy tituj të shtypit sportiv spanjoll pas fitores të së shtunës.

Aparati fotografik i së përditshmes spanjolle AS përcjell më poshtë imazhet e një nate magjike për Realin e Madridit në Kardif. /tesheshi.com/