Përfaqësuesi special i Bashkimit Evropian për dialogun ndërmjet Kosovës dhe Serbisë, Miroslav Lajçak, ka bërë të ditur se negociatorët kryesorë të dy palëve kanë paraqitur propozimet e tyre në Bruksel në lidhje me dekretin e Bankës Qendrore të Kosovës për ndalimin e përdorimit të dinarit në Kosovë.
“Kryenegociatorët e Kosovës dhe Serbisë prezantuan sot propozimet për rrugën përpara për personat që preken nga rregullorja e Bankës Qendrore të Kosovës për transaksionet me para të gatshme. Diskutimet tona të gjata ndihmuan në sqarimin e detajeve të rëndësishme”, shkroi Lajçak në rrjetin social X.
Ai shtoi se është rënë dakord që takimi të mbahet sërish javën e ardhshme “me ambicie për të gjetur një zgjidhje”.
“Sugjerime shumë larg njëra-tjetrës”
Shefi i delegacionit të Kosovës në negociatat me Serbinë, Besnik Bislimi, tha se propozimet e dy palëve për çështjen e dinarit janë ende shumë larg dhe se ka nevojë për një takim tjetër javën e ardhshme.
“Sot kemi paraqitur propozimet tona. Mendimi im është se këto propozime janë ende shumë larg njëra-tjetrës. Jemi përpjekur t’i afrojmë, por padyshim që ka nevojë për një takim tjetër”, tha Bislimi para gazetarëve pas takimit. Ai nuk ka dashur të japë detaje për propozimin, duke thënë se do të dëmtojë procesin e bisedimeve në këtë moment.
Reagoi dhe Drejtori i Zyrës për Kosovën në Qeverinë e Serbisë, Petar Petkoviç:
“Nuk e di se në cilin drejtim do të shkojë dialogu. Ne do të vazhdojmë të negociojmë. Ne do të investojmë atomin e fundit të forcës sonë vetëm për të arritur një zgjidhje”, tha ai për gazetarët në Bruksel.
Rregullorja e Bankës Qendrore të Kosovës, e cila është miratuar në fund të dhjetorit të vitit të kaluar, ka hyrë në fuqi më 1 shkurt të këtij viti.
Partnerët ndërkombëtarë, mbi të gjitha Shtetet e Bashkuara të Amerikës dhe BE-ja, kërkuan që të pezullohet Rregullorja e Euros derisa të gjendet alternativë për pagesën e pagave, pensioneve, përfitimeve sociale dhe të tjera nga Republika e Serbisë, të cilat arrijnë në euro. /tesheshi.com/
